Den luna di maart Aruba Lions Club tawata basta activo cu algun actividadnan tanto pa reconoce su miembronan cu nan trabou voluntario y tambe trabounan pa comunidad asina demostra di continua cu e bunita trabounan pa mas cu 75 aña den comunidad.
Na comienso di Maart a hasi un donacion di un cantidad di instrumentonan musical na skol “Inclusion” cu ta preparando un localidad pa musica unda e muchanan special aki por siña toka un of mas instrumento. E donacion aki cu un balor di mas cu 1000 florin a wordo ricibi pa e docentenan di dicho skol.
Tambe Aruba Lions Club a participa dia 16 di Maart den un projecto organisa pa algun studiante di Universidad di Aruba, cu e bunita meta pa trese tur hende hunto. Esaki a sosode den e casnan di pueblo di bario di Bushiri, caminda durante dia, algun miembro a prticipa judando den e projecto aki cu a consisti di un job-fair, deporte y tambe algun palabra di concientisacion pa e hobennan den e bario. Aruba Lions Club a contribui tambe cu un donacion na alimento y algo pa refresca. Un actividad hopi bunita pa e bario y cu a wordo bon atendi.
Por ultimo dia 16 di Maart, Aruba Lions Club a organisa un anochi di reconocemiento na su miembronan.
Esaki a cuminsa cu reconoce e ultimo grupo di miembronan nobo cu a ricibi nan pin di “We Serve” den un actividad formal, entre tur otro miembronan y nos ta papia aki di un grupo di 10 miembro, Ln. Edmar Lopez, Ln. Marc Fowler, Ln. Nehomar Croes, Ln. Ghislain Lampe, Ln. Maximo Lampe, Ln. Freyner Mejia, Ln. Nicole Ruiz, Ln. Hilda Statia, Ln. Gregory Trim y Ln. Tai-Foo Lee.
Despues di esaki a cuminsa e ceremonia pa instalacion di un miembro nobo Lion Ronnaly v/d Biest cu a wordo instala pa un life member cu alavez ta un “Past Council Chair” Ln. Frank Croes den presencia di nos gobernador actual di districto 35N, DG Ivan Croes.
Di parti ALC su meimbronan ta jama Lion Ronnaly un bon bini na e famia di leonnan.
Por ultimo den e anochi aki Aruba Lions Club a reconoce 12 di su miembronan cu ta “Life Members” cu a eherce e trabou voluntario pa hopi aña den comunidad via e prestigioso club Aruba Lions.
E miembronan aki a ricibi un bunita recuerdo y certificado for di man di e presidente actual Rubin Ponson den nomber di tur miembro, cu ta reconoce e trabou pa tur e añanan y manteniendo e club su existencia cu nan experencia.
Den e miembronan aki sigur nos por cuminsa cu esun di mas grandi y cu mas aña den club cu ta Ln. Alfonso Mirep cu algun siman atras a celebra su cumpleaños cumpliendo 100 aña y tambe tin 72 aña como miembro di Aruba Lions Club.
Esnan cu tambe a wordo reconoci ta, PCC Frank Croes, Ln. Maiky Croes, Ln. Carlos Maduro, Ln. Ebby Arends, Ln. Carlos Croes, Ln. Ronny Nicolaas, Ln. Benky Fowler, Ln. Chinto Tromp, Ln. Horacio Oduber, Ln. Chobby Croes y Ln. Satish Daryanani.
Segun e presidente Ln. Rubin Ponson, esaki ta un honor y previlegio pa por tin un cantidad di miembronan legendario cu tanto aña di participacion den e club, cu tanto experencia pa por trese e balansa den un organisacion y mantene esaki riba e liñanan corecto pa e trabounan cu ta wordo eherci na comunidad. Ta miembronan cu hopi conocemiento, integridad y respet den comunidad, y asina pa guia e nobonan riba e caminda aki pa nos tin mas miembro cu den futuro por sigui mantene e club y tambe formando leadernan den comunidad.
Aruba Lions Club ta e promer club di Lions na Aruba y ta spera cu por sigui sirbi e comunidad cu hopi aña mas.
