Durante Manifestacion Cultural
Minister-President Evelyn Wever-Croes y Minister Xiomara Maduro a haci entrega di e bandera oficial di Aruba na Scout Aruba pa hisa durante e acto protocolar
Durante e Manifestacion Cultural cu a tuma luga dia 17 di maart, en conexion cu Celebracion di Dia di Nos Himno y Bandera, Minister-President Evenlyn Wever-Croes y Minister Xiomara Maduro di Cultura a haci entrega di e bandera oficial cu a wordo hisa durante e Acto Protocolar riba Plaza Libertador Betico Croes.
E bandera, cu ta simbolo di unidad, cultura y herencia di nos Pais, a ser entrega na lider di Scout Aruba, Sr. Mariano Thiel. Cu e gesto aki, Sr. Thiel a ser honra cu e responsabilidad di ricibi e bandera for di man di ambos mandatario. Esaki a pone enfasis riba e respet y confiansa deposita den su persona y Scout Aruba, reconociendo nan dedicacion pa fomenta entre nos hobennan e sentido di patriotismo y di duna bek na comunidad. E momento unico aki a marca inicio di e celebracionnan di Dia di Himno y Bandera, un dia cu tabata sumamente bunita unda cu pueblo henter a sali y celebra nos dia nacional.
Minister di Cultura, Xiomara Maduro, a expresa su admiracion pa e trabou cu Scout Aruba ta haciendo, mencionando, ‘E grupo Scout Aruba, bou liderazgo di Sr. Mariano Thiel, ta ehempel di e balornan di liderazgo, servicio y comunidad cu ta fundamental pa nos identidad Arubano. Entregando nan e bandera oficial pa e Acto Protocolar ta un muestra di nan compromiso pa cu e principionan aki.’
E Manifestacion Cultural mes tabata un celebracion unico cu a duna un toke na e Dia di Himno y Bandera, unda cu tabata tin diferente presentacion di nos talentonan local cu a celebra cultura, historia, y arte di nos Pais. E anochi aki a sirbi como un momento pa reflexiona riba nos simbolonan nacional y e unidad cu nan ta representa.
E eventonan di e aña aki no solamente a conmemora nos simbolonan nacional pero tambe a reforsa e identidad colectivo y balornan cu ta haci nos Pais unico. Minister di Cultura kier a extende su mas sincero gratitud na Sr. Mariano Thiel y Scout Aruba pa nan rol den e Manifestacion Cultural, Acto Protocolar y nan esfuersonan continuo den formacion di e lidernan di mañan.
