Cayanan di San Nicolas tabata tarima pa e creatividad cultural di nos muchanan
Siman pasa, Minister di Cultura tabata presente na San Nicolaas pa asina presencia e Marcha Cultural 2024 organisa pa St. Paulus School. Durante e Marcha Cultural aki, e alumnonan ta haya e oportunidad pa presenta tur locual nan a siña pa 6 siman den cuadro di e vak ‘Orientacion di Mundo’ (Wereldorientatie) di e tema Aruba.
Tabata bunita pa mira con nos hobennan a presenta nan obranan di arte cu ta conta un storia di Aruba sea riba un pancarta, nan flanel of garosa. Un manera creativo cu nos muchanan ta expresa con orguyoso nan ta di e detayenan cu ta laga nan sinti nan mes orguyoso di Aruba.
Minister Maduro ta gradici St. Paulus School pa un bes mas a organisa e Marcha Cultural aki, unda cu nos muchanan por a presenta locual nan a siña den un forma inovativo y asina stimulanan pa participa den actividadnan cultural.
