Awor akí ku wikènt di Pasku di Resurekshon ta yegando, direktorado di Supervishon i Mantenshon di Lei ta anunsiá reglanan i instrukshonnan spesífiko pa kampamentu na nos bichnan. Intenshon di e medidanan akí ta pa garantisá un eksperensia di kampamentu seif i plasentero, miéntras na mes momentu nos ta protehá naturalesa i medio ambiente.
Periodo di kampamentu
Ta pèrmití pa kampa for di djaweps 28 di mart te ku djárason 3 di aprel riba nos bichnan di Boneiru. Esaki ta brinda oportunidat pa nos habitantenan i nos bishitantenan disfrutá di e tremendo ambiente durante e wikènt di Pasku di Resurekshon.
Aunke normalmente mirá kampamentu no ta pèrmití, pa e siman akí gobièrnu ta hasi un eksepshon, di manera ku nos habitantenan i nos turistanan por gosa di e tradishon akí.
Registrashon i responsabilidat
Ta supliká tur hende ku ta bai kampa pa registrá nan mes na Selibon. E registrashon akí ta hasi posibel pa nan monitoreá e kantidat di hende ku ta kampa i pa efektivamente kordiná e servisionan manera esun di rekohé shushi. Banda di esaki ta rekordá nos hendenan ku ta kampa riba nan responsabilidat pa nan mes kita tur loke nan a konstruí i eliminá tur shushi dia 3 di aprel.
Maneho di shushi
Selibon lo pasa tur mainta pa rekohé shushi riba e bichnan. Ta supliká tur hende ku ta kampa pa separá nan shushi den diferente kategoria, manera karbon, plèstik, glas, bleki i restu di shushi, pa di e manera akí kontribuí na un medio ambiente mas limpi.
Instrukshon pa konstrukshon
No ta pèrmití pa konstruí riba strukturanan eksistente.
Áreanan pèrmití i prohibí
No ta pèrmití pa kampa na Klein Bonaire, pero mas aleu tur otro bich ta disponibel pa aktividatnan di kampamentu.
Molèster di sonido i reglanan di komportashon
Ta pidi tur hende ku ta kampa pa tene kuenta ku otronan i minimalisá molèster di sonido, prinsipalmente entre 3 or i 6 or di mardugá, ora ku silensio kompleto ta un eksigensia. Na Sorobon ta kompletamente prohibí pa toka müzik, pa motibu di e stàtús protehá di e área.
Reglanan general
Ta bini ku un seri di regla i instrukshon general pa garantisá siguridat i bienestar di tur usuario di nos bichnan. Esaki ta enserá entre otro eliminá tur shushi adekuadamente, respetá nos ambiente natural i evitá ku ta stroba nos flora i founa.
Reglanan
- No tira shushi riba suela, tira tur shushi den kliko.
- Hasi uso di e klikonan ku ta disponibel.
- Hasi uso di un konfó òf grel. No sende karbon den santu.
- Tira restu di karbon den e klikonan ku ta destiná pa esaki.
- Ta prohibí pa kap òf snui mata den e bisindario kaminda bo ta kampa.
- No ta pèrmití kachó riba bich.
- No ta pèrmití vehíkulo riba bich.
- Ta prohibí pa landa i piska (piska ku un dùikbrel).
- Ta prohibí pa piska gutu i kue kref i karkó.
- No ta pèrmití pa konstruí riba un konstrukshon eksistente.
- Tur hende ku usa material òf artefakto pa konstruí nan sitio di kampamentu, ta responsabel pa no laga nada atras ora di rùim òp e sitio di kampamentu atrobe (por ehèmpel pèlet).
- Tene kuenta ku otro hende ku tambe ke hasi uso di bich, manera turista.