Ampliashon di e skema di wenter 2024 – 2025 ku dos buelo riba djasabra
Tourism Corporation Bonaire (TCB) ta kontentu di por anunsiá un ampliashon di su skema di buelo for di Miami ku American Airlines (AA). Den kolaborashon ku AA resientemente TCB a informá tokante e skema di verano binidero ku introdukshon di un di 4 buelo ida i buelta riba djabièrnè. Despues di e aktual eksitoso skema di wenter, AA ta konfirmá introdukshon di su di 5 buelo semanal pa Boneiru, kaminda for di luna di desèmber 2024 ta introdusí 2 buelo riba djasabra riba e ruta Miami – Boneiru.
Skema nobo:
For di 7 di desèmber 2024 AA ta introdusí dos buelo (nòn stòp) riba djasabra: un ku salida for di Miami pa 10.05 or i yegada na Boneiru pa 14.26 or, i e di dos buelo riba djasabra ku salida for di Miami pa 12.05 or i yegada na Boneiru pa 16.26 or.
Banda di esaki e buelonan di verano di AA ku resientemente a keda introdusí riba djabièrnè lo sigui forma parti di e skema di wenter, ku konektividat riba djaluna (1), djárason (1), djabièrnè (1) i djasabra (2). AA a konfirmá tambe un kambio den e tipo di avion pa Boneiru, ku introdukshon di e Boeing 737 riba e ruta Miami – Boneiru.
“Nos ta kontentu di por kontinuá ku nos kolaborashon ku American Airlines i ofresé konektividat mehorá ku Boneiru. E paso stratégiko akí no solamente ta fortifiká nos lasonan ku American Airlines, pero ta engrandesé tambe nos kapasidat pa atraé merkadonan sekundario na Merka,” segun Miles Mercera, direktor di TCB.
Pa mas detaye i pa reservá bo buelonan, bo por bishitá wèpsait di AA riba www.aa.com òf manda un email na marketing@bonaireisland.com.
