Kachó peligroso
Riba djaweps 21 di mart, alrededor di 4.45 or di atardi, ‘meldkamer’ sentral a risibí notifikashon tokante un kachó ku a ataká un señora riba Kaya Monseigneur Nieuwindt. Na yegada di e patruya e persona ku a mèldu a deklará ku e tabata kana riba karetera públiko i na un dado momentu un kachó a bini den su direkshon. Danki na shofùr di un pikòp ku tabata pasando na e momento ei, ku a bai ku e vehíkulo den direkshon di e kachó, pa evitá ku e kachó ta atak’é. E kachó ta pertenesé na un apartamentu riba e kaya menshoná. E agentenan seguidamente a bai e adrès en buska di e kachó i e doño. Na e adrès, e agentenan a topa ku un kachó blanku ku máron ku tabata kana pafó di kurá. E kachó tabata amabel ku e agentenan. Na dado momento e kachó a kana bai paden i e agentenan a será e porta di kurá. A papia ku e doño di e kachónan riba e situashon aki i a dun’é un atvertensia por eskrito.
KPCN ke hala atenshon di doñonan di kachó pa tene kachónan den kurá dor di sòru pa un kurá bon será for di kua e kachónan no por sali i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashon i treinen di bo kachó.
Detenshon pa menasa
Riba djárason 20 di mart, alrededor di 10 or di anochi, a detené un hòmber di inisial E.P.R.A. di 42 aña di edat pa menasa. Esaki en konekshon ku un notifikashon ku ‘meldkamer’ sentral a risibí tokante un pleitu entre bisiña na Subi Blanku. Segun e persona ku a mèldu, e sospechoso tabata kana ku un machete den su man. Na yegada di e patruya por a konstatá klaramente ku e sospechoso tabata bou di influensia di alkohòl. Durante un diskushon, e sospechoso a menasá su bisiñanan ku un machete. Ta investigando e kaso.
Detenshon
Riba djárason 20 di mart, alrededor di 8.40 or di anochi, a detené un hòmber di inicial N.E.H. di 40 aña di edat riba Kaya Yolanda pa maltrato, maltrato ku un arma, ladronisia i destrukshon. E sospechoso a destruí porta di un kas riba Kaya Linda, el a maltratá un dama i a dal’e ku diferente opheto. Despues el a kue telefòn di e víktima i bai kuné. Na momento ku e agentenan tabata tuma deklarashon di e víktima, e sospechoso a kore pasa dos biaha banda di e kas. Seguidamente e agentenan a bai tras di e sospechoso. A par’é riba Kaya Yolanda i a detené. Ta investigando e kaso.
Detenshon
Riba djárason 20 di mart, alrededor di 7.20 or di anochi, a detené un hòmber di inisial J.A.A.B.J. di 26 aña di edat riba Kaya Azusena pa menasa, maltrato, maltrato ku un arma i destrukshon. Durante un interkambio di palabra na un kas riba e kaya menshoná, e sospechoso a kòrta un hòmber na su plant’i man i a menasá un dama. Despues el a destruí un porta di kamber di e kas. Na momentu ku e patruya a yega na e sitio a detené e sospechoso. Investigashon den e kaso ta andando.
Detenshon pa destrukshon i menasa
Riba djárason 20 mart, alrededor di 8.30 or di mainta, a detené un hòmber di inisial R.C.C. di 24 aña di edat na Plaza Fraternan di Tilburg pa destrukshon i menasa. E sospechoso a menasá personal di un instituto i a destruí un porta. Investigashon den e kaso ta andando.