Shonnan tur, bon dia yen di sabiduria den nos alegria ! Nos ta spera cu boso tur a pasa un bon y dushi Dia di nos hymno y bandera.( Despues nos lo bin cu mas den un otro relato). Awe nos ta toca e tema di e anochi Encuentro Literario, Cultural y Linguistico, cu a tuma lugar na BNA ( Biblioteca Nacional Aruba) recientemente, riba un bunita anochi cu varios bunita presentacion. Un publico grandi y enthusiasma a goza di e anochi aki sigur. E strea grandi di e anochi aki tawata den persona di e cabayero Hindu Ashok Hirdaramani cu a presenta su interesante buki: “Passion Amazing Mindset” , pero a toca su guitarra electrico como Rock Star Guitarist/ Entertainer, cu Ash Music tambe. Lady Ruth ta corda e gentil cabayero aki cu su negoshi di panja den caya grandi, antes Nassaustraat,( awor Caya Betico Croes). Semper cu bon manera y respet pa tur su clientenan. E anochi aki na BNA, nos a conose e banda artistico di Ashok, (75 anja) bisti cu su sombre dorna cu cabey largo y cu hopi passion tocando e mihor di e musica di e banda “Santana” cu sigur hopi di nos, por corda tempo di nos tempo di hubentud. E anochi a habri cu musica di piano toca pa Vivian Lampe, e yui muhe di Padu Lampe (dfm) cu a toca varios cancion dushi y alegre y despues tambe algun cancion cu Livio Hermans (dfm) a gusta toca tempo e tawata na bida. Por cierto e anochi aki dedica na algun di nos dushi hendenan, e.o. na Livio Hermans. Cu hopi sintimento y aprecio Sra. Diet Booi ,( still going strong), a papia masha bunita mes di Livio y e publico presente por a sigui un video ariba pantaya cu dos di e tres yui hombernan di Livio, papiando di nan tata y gradici Aruba y tur cu a stima y conose nan tata. Tur presente por a goza tambe di scucha Sra. Ariana Koolman Chirino, recita algun poema. Un bunita “touch” di su amiga stima Lilian, ora cu Lilian a parti e papel cu e poemanan pa publico, y asina no falta nada di locual a wordo expresa cu asina hopi sintimento pa e Poeta Ariana . Tambe a hiba palabra encuanto con a cuminsa skirbi buki y of poemanan, Roberto Croes y Jossy Farro bibando na Hulanda, pero cu Aruba ketobay den su humilde curason a crea un arte di potret impresionante di e mannan di Livio tocando piano cu lo ta colga den BNA. Tawatatin canto di un duo, alumnonan ya hoben adulto, di Maybeline Arends Croes cu a pone varios persona presente subi e pista di bayle ora nan a canta e dushi cancion di Etty Toppenberg (dfm) “Solo lo no briya”pa di dos biaha. Un di e rumannan di Etty presente, tambe a subi e pista y bayla cu smak. Ta mas cu claro cu mi amiga, e simpatico y talentoso Verna Beaujon y Lady Ruth tambe a subi e pista pa los e heupnan un crenchi. Publico tawata canta hunto cu e duo, y goza di e super dushi ambiente. Despues e banda musical di Ashok a cuminsa toca e canticanan di “Santana” y atrobe e pista a yena cu hendenan cu ta amante di musica y of amante di “Santana”. Ashok tin hopi anja na Aruba, y a integra su mes cu hopi amor pa Aruba. E biaha aki atrobe Romar Trading a regala dushi binja y champagna cu a baha bon cu e dushi snacknan. (Spera cu Milton Harms a recupera di su salud mientrastanto). Ach, nos tambe ta birando un crenchi mas grandi lentamente, pero tanten e salud fisico, mental y spiritual tey, nos ta hasi nos best pa relata cosnan bunita y positivo den nos relato. Nos no ta bay pa tuma nota y skirbi tur cos pasando, nos ta sinti na nos curason. Lady Ruth sa tuma pics prome y of despues di e actividad, pa no falta nada di e programa andando. Ta un di nos hobbienan pa skirbi y comparti cu nos lectornan di e prestigioso corantnan Diario y Solo y tambe on line di Earubiano News. Ta djies pa duna lectornan un chispa chikito di actividadnan cultural social na nos manera poetico describi. Danki pa boso atencion di curason. Pasa un bon dia yen di sabiduria den nos alegria ! Alegria nos por crea y organisa. Morto sa bati na porta inespera. Manera ta e caso cu bon amigo director di e negoshi “Shoe Express” Juan Carlos ( awe dfm), cu awor ta mas serca di mente, alma y curason. Un shon di hende di Colombia cu tambe tin hopi anja integra aki na Aruba cu su famia bunita. Famianan y amigonan a tuma despedida di Juan Carlos den Iglesia Fatima Dakota cu un misa bunita canta fey cuminsamento te fin di e misa, tremendo coro. Juan Carlos tawata un homber di fe cu tawata tin atencion y amor pa tur rond di dje y pa su prohimonan di Misa. Hopi forza, condolencia, consuelo y amor na su bunita sra.esposa Vda. Bertha, su yuinan, nietonan y demas famia .Cu Don Juan Carlos sosega na paz y luz eterno luza p’e. Un “bearhug” di Lady Ruth pa tur nos lectornan. Nos tambe ta tuma bida “One day at a time”.
