Na kuminsamentu di luna di febrüari e tim di Tourism Corporation Bonaire (TCB) a registrá pa partisipashon na e di 13 edishon di BON DOET. E aña akí TCB a bai Sentro ‘Nos Perseveransia’, ku for di aña 2023 ta operashonal komo parti di Mental Health Caribbean. TCB su tarea di e aña akí riba djabièrnè 15 di mart a konsistí di plantamentu di mas ku 160 palu i mata durante un seshon parti mainta ku a dura kuater ora. Un tim di mas ku 10 persona a traha huntu pa embeyesé e parti di vegetashon i pa krea mas posibilidat pa enbolbimentu.
BON DOET ta un kampaña grandi di trabou boluntario na Boneiru ku e tim di BON DOET i e plataforma di NGO ta organisá den kolaborashon ku Oranje Fonds. BON DOET huntu ku ARUBA DOET, CURA DOET, SXM DOET, STATIA DOET, SABA DOET i NLdoet ta forma e evento di trabou boluntario di mas grandi di Reino hulandes. E aña akí e evento a tuma lugá dia 15 i 16 di mart, kaminda a ehekutá hopi tarea na varios fundashon i asosiashon.
E fundashon ku TCB a skohe, esta Mental Health Caribbean (MHC) na nòmber di Kuido i Hubentut Hulanda Karibense (Zorg en Jeugd Caribisch Nederland – ZJCN) ta organisá kuido sikológiko i sikiátriko i kuido di adikshon pa e islanan di Hulanda Karibense. Na MHC tin diferente disiplina ta traha, manera enfermera/-o sikiátriko, enfermera/-o sosial sikiátriko, sikólogo (pa mucha i hóben), sikiáter (pa mucha i hóben), trahadó sosial, guia di aktividat, guia di alohamentu protehá, trahadó di prevenshon i empleado di kuido forénsiko. MHC ta un fundashon apart, statutariamente establesé na Boneiru. Un di e fasilidatnan di alohamentu ta Sentro ‘Nos Perseveransia’, kaminda TCB a bai pa ‘Hasi bon, pasa bon!’
Banda di esaki Sentro ‘Nos Perseveransia’ ta ofresé un fasilidat di alohamentu ku un kapasidat pa 18 persona for di 18 aña ku tin mester di guia pa motibu di problemátika di adikshon, problemátika sikiátriko, un limitashon intelektual leve, òf un kombinashon di esakinan. E sentro ta ofresé tambe ayudo ambulante, aktividat durante dia i guia na momentu di drenta merkado laboral, na kaminda pa e forma mas haltu di independensia. E guia ku nan ta ofresé ta enfoká riba rekuperashon sosial, empoderamentu i ekspertisio a base di eksperensia, di manera ku e partisipantenan, no opstante nan limitashon(nan) por funshoná satisfaktoriamente den e ambiente di nan eskoho.
Finalmente, segun nos lema ta bisa: ‘It’s in our nature’, loke ta nifiká ku nos ta yuda otro i ku nos ta kuida nos naturalesa pa medio di hasi trabou boluntario i planta mata endémiko. Mata tin hopi bentaha, entre otro redukshon di strès, mehorashon di kalidat di aire i ayudo pa un rekuperashon rápido. Tur esaki ta tuma lugá miéntras e matanan ta rondoná bo, pero trahamentu den hòfi tin hopi mas tantu bentaha ainda, manera drecha bo bèis, regulá bo sistema inmuno, fortifiká bo wesunan, i e ta konta komo ehersisio tambe.
Tira un bista riba nos plataformanan di medionan sosial pa un video plasentero di e esfuersonan di e tim di TCB. Pa mas informashon tokante trabou boluntario i kon bo por aportá na bo propio manera na nos komunidat, bishitá wèpsait di e plataforma di NGO: www.ngobonaire.org. Pa mas informashon tokante MHC i tur loke nan ta hasi, bo ta bai riba nan wèpsait: www.mentalhealthcaribbean.com.
Durante e seremonia di klousura ku a tuma lugá djasabra 16 di mart, e tim di TCB a risibí e premio pa mihó ‘reel’.
