Dialuna pa 4:40 mainta central di polis ta wordo notifica di un accidente pisa na altura di Nagico na Savaneta entre un auto y brommer.
Patruya ta yega na e sitio di sucedido y ta topa cu un situacion basta grave.
E prome patruya cu a yega na e sitio a pidi ambulance cu maximo urgencia mirando e situacion di e chauffeur di brommer pero lamentablemente no por a haci nada mas pa e victima.
Pa 5:30am dr.Texier ta constata morto di e hoben Maximilian Thomas A. Hernandez Pinedo naci na Aruba 4 april 2003 ( 20 aña).
Prome informe cu a logra compila ta cu probablemente e Nissan March color blauw numera A-50141 tabata bayendo direcion pariba y tabata pasando un truck di Eco- Tech. E brommer Susuki numera MFA-2664 tabata biniendo direcion pabao lo a dal frontal den e Nissan March.
Den e Nissan March tabata tin 4 persona. Tur a haya asistencia medico na e sitio mes.
E chauffeur di e Nissan March a wordo deteni pa maneha auto bao influencia di alcohol y no tin rijbewijs tampoco.
Specialista di Trafico a presenta na e sitio como tambe polis technico pa asina haci nan investigacion.
Na e sitio tambe tabata tey presente Fiscal di Ministero Publico, Departamento di Slachtofferhulp a presenta pa brinda sosten y ayudo na e famia di e victima den e momento dificil aki.
Tambe altocomisario di polis drs. Ramon Arnhem tambe a bin na e sitio pa e tuma nota di e accidente tragico aki.
Cuerpo Policial ta manda palabra di condolencia y forsa na famia di e fayecido.
Un apelacion di parti Cuerpo Policial Aruba pa ban baha velocidad, no bebe y stuur y sigi reglanan den trafico.
