Aruba Hotel & Tourism Association (AHATA) ta sigui inverti den nos studiantenan local cu un donacion grandi di ekipo culinario nobo na EPB Oranjestad. E donacion lo yuda e scol completa un di dos cushina, pa asina por ofrece miho formacion profesional na e gran volumen di studiante.
Durante un bishita na e scol, Presidente y CEO di AHATA, Sra. Tisa LaSorte, a entrega e donacion na Director di EPB Oranjestad, Sr. Erwin Lopez, y docente di e programa culinario, Sr. Orlin Geerman. E representatenan di e scol a manifesta gran entusiasmo pa preparacion di e studiantenan, pa asina duna nan mihor oportunidad pa un carera exitoso. Sr Lopez y Sr. Geerman a expresa gratitud pa e aporte di AHATA cu e donacion valioso. E ekipo nobo lo yuda alumnonan desaroya e diferente habilidadnan necesario pa por traha den un cushina profesional den futuro.
E inversion aki ta refleha AHATA su compromiso pa aporta na un forsa laboral prepara y cualifica pa asina yuda sera e “gap” entre educacion y e mercado laboral. E sector di turismo tin necesidad grandi pa talento culinario y e asociasion ta spera cu e donacion aki lo inspira mas hoben pa sigui nan estudio y conecta positivamente cu e bunita carera den mundo di gastronomia.
