Nos Naturalesa frecuentemente a wordo trata como un simpel mercancia, un obheto pa ser uza na nos conviniencia pa ganashi economico. Accionnan humano a pone cu nos medio ambiente awe ta na un punto unda ecosistemanan cu nos ta depende ariba no por funciona manera antes.
Durante un conferencia di prensa Minister di Naturalesa, Sr. Ursell Arends a duna di conoce e siguiente paso pa introduci e proposicion di ley di Derecho di Naturalesa den Aruba su constitucion.
E legislacion aki ta un paso historico pa reconoce dos derechonan interconecta y fundamental:
- e derecho humano pa un ambiente limpi, saludabel y sostenibel,
- y e derecho di naturalesa su mes, tanto riba tera como bou awa, pa conservacion, restauracion, y regeneracion.
Reconociendo e derechonan di naturalesa, Ministerio di Naturalesa ta afirma cu naturalesa no ta un obheto pa ser mal uza, pero un suheto bibo cu derecho inherente. E reconocemento aki ta percura pa un base fuerte pa e instrumento legal necesario pa proteha Aruba su herencia natural.
“E caminda pa asegura un futuro sostenibel ta uno cu nos tin cu cana hunto. P’esey Ministerio di Naturalesa ta invita cada ciudadano pa participa den un proceso di consulta. Bo pensamentonan, sugerencianan y comentarionan no ta solamente di balor, nan ta esencial,” Minister Arends ta remarca. Feedback lo wordo considera ciudadosamente y por cause cambio vital den e proposicion di ley di Derecho di Naturalesa, mientras e ta canando su caminda legislativo formal y presenta na Raad van Advies.
Ministerio di Naturalesa ta invita comunidad henter pa bishita e website di Publico.aw unda cu por lesa e proposicion di ley den e tab di consulta. E formulario por wordo yena anonimamente, asina fomentando un dialogo transparente.
E formulario lo ta disponibel di 14 di maart te cu dia 4 di april 2024 pa ricibi feedback. Pa cualkier pregunta por email naturalesa@gobierno.aw .
Tambe e ministro a duna di conoce cu lo conduci dos anochi informativo unda comunidad por haci preguntanan, cera conoci cu e proposicion di ley y participa activamente den e discusion.
E fechanan ta lo siguiente, diaranson 27 di maart na MFA Savaneta di 6:30 PM te cu 7:30 PM y diahuebs 28 di maart na MFA Paradera, di 6:30 PM pa 7:30 PM.
Minister Arends su compromiso pa incorpora Derecho di Naturalesa den Aruba su constitucion ta señalisa e promesa di Aruba pa ser un lider global como defensor di Naturalesa. Tambe a subraya e principionan poni dilanti di number 16 di e Metanan Mundial pa Desaroyo Sostenibel (SDG 16), cu ta boga pa sociedadenan inclusivo, husticia pa tur, y creacion di institucionnan efectivo y responsabel. E principionan aki ta guia nos caminda pa un coexistencia harmonioso cu naturalesa.
