Dia 18 di maart Centro di Bario Savaneta lo tin su actividad anual p’asina celebra nos dia nacional, dia di nos Himno y Bandera. E actividad ta cuminsa 12or di merdia te cu 6or di atardi, cu entretenimento pa Tipico Pegasaya, Tipico Folklore Nos Herencia, Daniel y su Coco Loco Band, Caha di Orgel Mi Dulcita y gruponan di baile cu lo deleita esnan presente.
Ademas lo tin weganan popular pa grandi y chikito organisa conhuntamente cu Spel Zonder Grenzen cu semper ta trece e ambiente competitivo y animacion. Y un mini bazaar cu cos dushi, acesorios y artesania. Nos bar y cushina tambe lo ta bon surti. E cushina lo tin dushi cuminda crioyo, entre otro, bacalao, carni stoba, sopi carni y mucho mas.
Meta di e actividad ta pa promove semper nos cultura y tradicionnan como tambe recauda fondo pa por inverti den e edificio y veld deportivo di Centro di Bario Savaneta. Nos ta invita un y tur pa pasa bishita nos dialuna 18 di maart. Bin pasa un rato ameno den compania di bo famia y amistadnan.
Like e pagina di Facebook di Centro di Bario Savaneta y keda al tanto di e diferente actividadnan cu Centro di Bario Savaneta ta ofrece durante aña na henter e comunidad di Aruba, en particular esnan di Savaneta y bisindario.
