For di 1 di aprel 2024, studiantenan prosedente di region Karibense ku ta bai studia na Hulanda, lo haָña un number di identifikashon personal (BSN) ora nan hasi petishon pa finansiamentu di estudio. Esaki ta permití nan regla algun asuntu relatá na nan estudio adelantá kaba for di region Karibense . Esaki ta un deseo di hopi tempu ku finalmente ta bira realidat.
Te ku awó, studiantenan for di Bonaire, Saba, Sint Eustatius, Aruba, Kòrsou i Sint Maarten solamente por hasi petishon pa un BSN na momentu ku nan inskribí nan mes na un munisipio na nan yegada na Hulanda. Esaki ta nifiká ku ta te na momentu ku nan yega Hulanda, nan por regla hopi di nan asuntunan. Pa eliminá e problema aki, Dienst Uitvoering Onderwijs (DUO) den kolaborashon ku Ministerio di Enseñansa (OCW), Ministerio di Asuntunan Interno (BZK) i Rijksdienst voor Identiteitsgegevens (RvIG) a pèrkurá pa studiantenan Karibense por risibí un BSN mas tempran.
Pidi BSN via telefòn na DUO
DUO ta kompartí dato di e studiante ku Rijksdienst voor Identiteitsgegevens (RvIG) pa tur petishon pa finansiamentu di estudio for di region Karibense entregá promé i despues di 1 di aprel, pa aña akadémiko 2024-2025. Asina ku RvIG prosesá e informashon, nan ta manda un karta ku e BSN pa e studiante. Pa motibu ku pòst den region Karibense por tarda, e studiante tin e posibilidat tambe pa pidi e BSN via telefòn na DUO. Lokual ta keda meskos den e proseso ta ku, studiantenan Karibense mester inskribí nan mes na e munisipio ku nan ta bai biba dentro di 5 dia despues di nan yegada na Hulanda .
Regla asuntunan di forma mas fásil
Ku e BSN, studiantenan por pidi un DigiD promé ku nan sali pa Hulanda, kual nan por usa pa ‘log-in’ riba e wèpsaitnan di gobièrnu Hulandes. Asina, studiantenan por ’log-in’ por ehèmpel, riba Mijn DUO i mira e suma di nan finansiamentu di estudio, informá tokante kambio i risibí mensahenan personal. Tambe studiantenan por traha un sita adelantá na algun munisipio unda nan lo bai biba pa inskribí nan mes.
Informashon den region Karibense
Den e periodo di 2 te ku 26 di aprel, kolaboradónan di DUO lo ta na tur e islanan di Karibe pa duna informashon tokante finansiamentu di estudio na studiante ku ta bai studia i nan mayornan. Durante e enkuentronan aki tambe lo duna splikashon tokante BSN i otro asuntunan ku studiantenan mester regla pa ku nan estudio na Hulanda. Ademas, DUO lo habri un ofisina di servisio temporal na kada un di e islanan aki, unda studiantenan por akudí ku nan preguntanan. Eks studiante tambe por bishita e ofisina ku pregunta tokante pagamentu bèk di nan debe di estudio si nan tin esaki.
Pa mas informashon tokante e enkuentronan di informashon i ofisinanan di servisio temporal, bishitá duo.nl/bezoekantillen.
