Recientemente mi a tuma nota di un articulo den cual AVP kier apropia di logronan di Gabinete Wever-Croes-II. Parce cu kico cu bay bon aparentemente ta pa via di AVP. E mentalidad maligno di AVP, cu tin 7 aña pafo di gobierno, ta keda demostra un biaha mas a traves di su mentira y manipulacionnan. Pa colmo awo su lider Mike Eman a sali tira insulto, mentira y kier menasa cu mester “bolter cos.”
AVP kier apropia di turismo cu su logronan historico na 2023 y 2024
Na varios occasion Arthur Dowers, Mervin Wyatt-Ras y Mike de Meza kier apropia di e logronan den turismo di e gabinete actual. Un gabinete cu mester a nabega a traves di e tormentanan mas catastrofico di nos pais. Na 2017 Horcan Mike Eman y de Meza a laga nos pais financieramente na werki cu un MEGAdebe. Apenas 3 aña despues ta yega pandemia COVID-19 pa devasta nos pais y henter mundo di un forma inespera! Nos conoce e storia. Apenas dos aña den e pandemia na 2022, ministernan di Gabinete Wever-Croes a tuma e curashi pa habri nos fronteranan bek pa turistanan cuminsa bin bek na nos isla. Ya pa 2023 practicamente tur luna recordnan financiero den turismo compara cu 2019 tabata wordo registra. Kico AVP ta bisa? Ta nan a logr’e! Ma bon, con troci y desespera AVP por ta anto?
AVP kier apropia di exploracion di gas y petroleo door di compania Armstrong
Awo cu gobierno ta anuncia exploracionnan nobo di gas cu petroleo AVP ta lanta cabes atrobe cu esaki ta nan vision y proyecto. Gañamento formal! Compania Aruba di Petroleo (CAP) a wordo funda pa ex-prome minister di pais Aruba sr.Nelson O. Oduber pa atende cu exploracion di gas y petroleo! Asina ta, kende a bin cu e vision? Un AVP kibra y desespera? E unico exploracion cu AVP a yega di haci ta den e fondonan di RDA, for di cual miyones a desaparece pa friends and family segun rapport forensico di RDA! Ademas, ken por lubida e gran “exploracion” di un CITGO cu nunca a habri, cu nunca a produci nada, cu nunca a bay niun caminda, pero si a yena saco di AVP?
AVP kier “Bolter Cos!”
Recientemente nos por a scucha Mike Eman sali cu mester “bolter cos” pasobra gobierno ta parti placa pa “friends and family.” Tanto cu nan a gaba “CAft” na 2021 cu tabata saca rapport contra gobierno su maneho meymey di un pandemia catastrofico, pero awor cu CAft su rapportnan di 2022-2024 ta uno positivo y ta declara cu gobierno ta cumpli cu tur norma, Mike Eman ta resorta na menasa pa “bolter cos.” E slogan di un partido kibra na pida, cu un credibilidad na werki, awor kier “bolter cos.” Ta parce cu e slogan di e “bon comun” a sufri un “morto comun” y pesey mester a cambi’e. Pueblo por wak e rapportnan y resultadonan di un gobierno serio cu ta bahando debe structuralmente, cumpliendo cu normanan di supervision financiero y cu ta liderando nos pais den recuperacion. Si tin un caminda cu “cos a bolter” ta ora Gabinete Wever-Croes a salba Aruba di Horcan Mike Eman cu a laga Aruba na bancarota y sin fondo pa enfrenta un pandemia devastador! Ban serio si!
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
