Riba djamars 27 di febrüari último tabatin un reunion públiko di Konseho Insular pa toma di desishon i komo punto di agènda number 9 tabatin ‘Preparashon pa e konferensia di trabou tokante WolBES i FinBES na Den Haag’. Meta di e deliberashon tokante e punto di agènda 9 akí tabata pa determiná e aporte di Konseho Insular di Boneiru na e konferensia di trabou ku ta tuma lugá di 4 te ku 6 di mart 2024. Pa e konferensia di trabou akí sekretario di estado Van Huffelen a invitá gobernantenan i representantenan di pueblo di Boneiru, Sint Eustatius i Saba pa konkluí e proseso di konsultashon relashoná ku e Lei di Revishon WolBES/FinBES. Boneiru su aporte ta formulá den un dokumentu titulá: Punto di bista di Boneiru relashoná ku revishon di WolBES i FinBes. E dokumento akí ta nobo i nunka ainda no a bini den publisidat komo tal, te pa pueblo por ta na altura di su kontenido. Den e dokumentu ta analisá e prinsipionan i puntonan di salida di struktura di gobernashon di e islanan BES i e relashon ku gobièrnu di reino. Tambe ta trese proposishonnan dilanti pa loke ta trata algun tema fundamental ku lo mester sirbi komo base pa adaptashon i kambio den WolBES i FinBES. E prinsipionan i puntonan di salida ta enfoká riba fortifikashon di outonomia di e islanan akí i nan ta lo siguiente: 1) E órden hurídiko den e sistema estatal hulandes ta keda vigente, 2) Outonomia i outodeterminashon, 3) Struktura nobo di gobernashon, i 4) Diferensiashon. Mas aleu e dokumentu ta kontené 13 proposishon basá riba organisashon atministrativo, relashon ku reino, finansa, supervishon gubernamental i finansiero, i atmishon i establesimentu. Algun di e 13 proposishonnan akí ta: Ampliashon i fortifikashon di Konseho Insular. Ampliashon di Kolegio Ehekutivo. Nombrashon di gezaghèber. Representante permanente na Den Haag. Formulashon nobo pa kalkulashon di aporte di reino i kompensashon liber. Mas responsabilidat i espasio pa maneho finansiero. Restrikshon di atmishon i establesimentu pa suidadanonan ku no ta boneriano.
Dikon ta skonde kos pa pueblo?
Na e punto 9 di agènda ya menshoná konsehal Humphrey ‘Junny’ Wout a pidi voto pa kabes tokante aprobashon di e dokumentu akí. Konsehal Wout di frakshon di MPB a vota kontra. Segun konsehal Wout e tin opheshon fuerte kontra e echo ku e dokumentu menshoná akí riba a bira realidat sin ningun klase di enbolbimentu di pueblo. No tabatin kampaña di informashon den ningun forma i no tabatin konsultashon ku pueblo, no físikamente i tampoko por ehèmpel via internèt. Pueblo no tabata sa i te ainda no sa kiko ta intenshon di e konferensia di trabou akí. Nunka no a ni pensa di tene por ehèmpel un seshon di ‘white paper’ kaminda pueblo por a partisipá. Banda di esaki konsehal Wout ta trese tambe e siguiente argumentonan dilanti pa supstansiá su voto kontra:
- E proseso pa yega na un dokumentu final no a kana konforme e prosedura formulá den Lei di Transparensia Públiko BES i no tabata transparente.
- Vários biaha kaba frakshon di MPB a supliká pa hasi e proseso ku a kana te ku awor públiko, huntu ku tur dokumentu korespondiente, di manera ku pueblo por duna opinion tokante esaki i kuestioná tambe kaminda ta nesesario. Lamentablemente nos no a logra haña mayoria pa esaki. MPB i UPB a vota na fabor di transparensia i Demokrat, M21 i Vrolijk a vota kontra.
- E dokumentu en kestion tin un karakter dudoso kuné, enkuanto kua rumbo ke bai ku revishon di WolBES i FinBES. Parse ku tin un agènda skondí pa bai atendé ku struktura estatal, kaminda no ta esei ta e meta. No ta frakshon di MPB so ta bisa esaki, pero tin mas konsehal ku a vosiferá e mesun preokupashon akí.
- Frakshon di MPB sí ta kere den Bon Gobernashon i ta traha segun e Lei di Transparensia di Gobernashon BES (Wet Openbaarheid van Bestuur BES). Un tipo di proseso asina’ki ku konsekuensianan asina grandi pa destino i futuro di nos hendenan na Boneiru, MESTER ta transparente pa pueblo. P’esei frakshon di MPB hamas lo por kontribuí pa skonde kos di e embergadura akí pa Boneiru su pueblo. Nos sigur ta kere den union, pero kaminda tin kos robes ta tumando lugá, nos no por uni djis pa bisa ku nos ta uní. Kaminda tin kos malu i di índole inkonfiabel ta tumando lugá, nos no por kana siegamente bai tras di palabra bunita.
- Esaki mes tambe ta e motibu pakiko frakshon di MPB a bini ku e proposishon pa splets e dokumentu den dos. Un parti ku ta enserá e kambionan den WolBES i FinBES, i un otro parti ku ta kontené un lista di deseo polítiko pa Boneiru su futuro. E proposishon akí tampoko no a haña mayoria.
- Den kaso ku frakshon di MPB a logra haña mayoria na fabor pa splets e dokumentu, e ora ei nos lo a proponé pa organisá un enkuentro, esta un seshon di ‘white paper’, pa den transparensia ku pueblo di Boneiru fiha ki rumbo nos ke sigui den e barku akí. Lamentablemente no a yega asina leu.
- Awor akí no tin espasio pa bai debatí tokante kualke rumbo deseá. For di aña 2020 a formulá e proposishonnan pa kambio den WolBES i FinBES, i awor nos ta bai ku un dokumentu ku ta kana banda di e proposishonnan di e tempu ei. Ministerio di Asuntunan Interno i Relashonnan den Reino a splika bon kla kaba ku lo pone tur loke ku no ta kai bou di kambio di WolBES i FinBes ‘on hold’, te ora yega e momentu ku tin espasio riba agènda pa atendé ku esakinan.
Finalmente konsehal Wout ta trese dilanti ku frakshon di MPB ta bai partisipá na e konferensia di trabou na Den Haag. Nos lo hasi nos máksimo esfuerso pa sali na interes di pueblo boneriano. Ku e kambionan di lei akí nos ta spera ku Boneiru ta bai haña un relashon di gobernashon ku Hulanda ku ta mas efisiente i mas mihó, semper ku rèspèt mutuo.