Santiago of Jacobo 1:16-17 ta bisa nos; No sea gaña, mi rumannan stima. Tur bon regalo y tur don perfecto ta for di ariba, y ta baha bini for di e Tata di lusnan, serca Kende no tin variacion, ni sombra di cambio. Esey ta nifica cu tur cos bon ta bini di Dios, Dios den su inmenso misericordia por purba nos , por disiplina nos, por coregi nos, pero nos tur sa sigur cu bendicion ta bini di Dios. E diabel no por bendiciona cu nada.
Pesey ta para scirbi den Jeremias 17:7-8 : Bendiciona ta e hende cu ta confia den Señor, y kende Su confiansa ta den Señor. Pasobra e lo ta manera un palo planta canto di awa, cu ta manda su raisnan bay na un corida di awa, y cu lo no tin miedo ora calor bini,ma su blachinan lo ta berde, y den aña di secura,e no ta preocupa, ni laga di duna fruta.
Tur cos ta cuminsa cu e confiansa cu nos mester tin den Señor pasobra solamenta asina ey nos lo ta manera un mata planta canto di awa, cu ta manda su raisnan bay na un corida di awa.
Ora nos ta haci oracion na Dios, nos ta manda nos peticion na cielo caminda nos Dios ta, y Dios ta manda bendicion na tera caminda nos ta.
Mester tin un comunicacion constante cu Dios, pa nos bendicion ta constante, falta di oracion, ta demostra falta di confiansa y comunicacion cu Dios.
Tur crecemento spiritual ta bini door di propio esfuerso, propio dedicacion, y propio perserverancia, no ta cos cu hende por haci pabo, no ta cos cu bo por copia tampoco, crecemento spiritual no por wordo manda digital, e ta un preis cu tur hende cu kier crece den Señor mester paga personalmente.
Si un hende no dicidi den su curason cu e kier crece, e no por rabia cu otronan cu si ta haci esfuerso pa nan crece.
Dios ta usa hende simpel, esnan cu a wordo menosprecia, Dios ta halsa nan pasobra nan ta humilde y nan ta disponibel pa e trabao di Dios.
Pasobra Dios no a duna nos un spirito di temor,sino di poder,y di amor y di sano huicio.( 2Timoteo 1:7).
Dios ta yama esun cu no ta, pa asina Dios pone den e lugar Dios kier, pasobra di tur forma Dios lo ricbi tur honor y gloria.
Ma si nos ta cana den lus, mescos cu E mes ta cana den lus, nos tin comunion cu otro , y e sanger di Hesus, su Yiu lo limpia nos di tur pica.(1 Juan 1 :7-9).
Den Juan capitulo 15:1-17: Hesus ta mustra nos tur cu berdaderamente nos mester permanece den dj’E y E den nos pa asina nos por duna fruta, ningun mata no por duna fruta si e no ta pega na e ranca.Pasobra un mata cu no ta pega na e ranca ta seca y muri y caba na nada.
Pero un ranca ta permanece den e mata, tur ora su blachinan lo ta berde y tambe e lo carga hopi fruta pasobra e a permanece den e mata.
Un bida dedica na Señor buscando crecemento dia tras dia, ta demostra un confiansa enorme den Dios su palabra. Pasobra nos no ta mira Dios, pero Dios si ta mira nos y ta sostene nos cu su palabra, pesey nos mester di su palabra tur dia.
Laga nos pone tur orguyo y falta di pordon un banda y busca e crecemento den Cristo Hesus nos Señor.