Mentira y manipulacion ta enemigo di tur hende pasobra nan ta bini directamente for di e reino di maldad.E tata di mentira cual ta e diabel ta yena hende su mente y curason pa nan gaña otro asina pone otro trompica y causa dolor den bida y tambe den cas di famia.
Tur mentiroso y manipulador ta wordo reconoce na nan frutanan, nunca nan ta contento cu liderasgo, semper nan por mihor, semper nan tin critica destructivo, nan mente no ta den cosnan di Dios, pero den cosnan di mundo. Nan por lanta un tienda, den un tienda, pa asina kita pas y trankilidad y causa division.
Hende manipulador ta tolera tur sorto di bagamunderia pasobra ta esey ta e mundo cu nan ta bida aden, caminda nan mes ta gaña y wordo engaña.
Den Romanonan 16:17-18 Apostol Pablo ta spierta nos:
Awor mi ta roga boso,rumannan tene na bista, esnan cu ta causa division, y strobacion contrario na e siñansa cu boso a haña. Pasobra hendenan asina ta esclavo, no di nos Señor Cristo, ma di nan mes apetit, y cu nan palabranan suave y agradabel nan ta gaña curason di e inocentenan.
Efesionan 4:22 ta bisa:
Pa encuanto boso manera di biba di antes, boso pone un banda e hende bieu cu ta wordo corumpi conforme e pasionnan engañoso.
Efesionan 4:25 ta bisa:
Pesey poniendo mentira un banda, cada un di boso, papia berdad cu otro,pasobra nos ta miembro di otro.
Efesionan 4:29 ta bisa:
No laga ningun palabra dañino sali fordi boso boca, sino solamente palabra cu ta bon pa edificacion,conforme e necesidad di e momento, pa esaki por duna gracia na esnan cu ta tende.
Dios a manda un gran spiertamento pa nos tur, pa tur hende ta alerta kico ta bay pasa, y kico ta pasando awor aki, pa asina evita tur esnan cu ta kere den Dios, di ta complice di maldad, inmoralidad y abominacion of ta tolera nan , of ta consenti cu nan.
Señor a adverti nos tur di e siguiente forma;
Ma sabi esaki cu den ultimo dianan temponan trabahoso lo bini, pasobra hende lo ta stimado di nan mes, stimado di placa,gabado, arogante,blasfemado,desobedecido na mayornan,ingrato,impio,sin amor, ireconciliabel,cu mala lenga, sin dominio propio, grosero, odiado di loke ta bon, traido imprudente,soberbe,mas bien stimado, di placer cu stimado di Dios, cu tin apariencia di ta religioso berde, ma cu ta nenga su poder evita sorto di hendenan aki.( 2Timoteo 3:1-5).
E spirito di mentira y manipulacion tin un gara fuerte riba e mundo, te asina lew cu e ta gaña hende y pone leynan wordo cambia, pa asina e mentira por haña forsa, y e plan diabolico wordo ehecuta.
Pesey nos mester para firme y bisa duro: Ami y mi cas ta sirbi Señor, pasobra ta hopi bagamunderia tin nan caminda, cu lo causa dolor y division den cas di famia, scondi bao di e capa di mentira y manipulacion.
Mentiroso y Manipulador ta compromete nan integridad, y consecuentemente nan ta perde credibilidad serca otro nan.Y al final de la cuenta Dios lo saca tur cos na cla pa ningun hende no kere den e mentira mas.
Hesus a bisa den Mateo 5:37:
Ma laga bo si ta si, of bo no ta no,y tur loke ta mas cu esey ta for di e malbado.
Lepnan mentiroso ta un abominacion pa Señor, ma esnan cu ta trata cu fieldad ta Su delisia. (Proverbionan 12;22).
Mas nos busca cara di Dios, mas oracion nos haci , mas leu nos ta keda for di mentira y manipulacion.
