Na vários okashon komo miembro di Konseho Insular mi a manda puntra Kolegio Ehekutivo tokante e maneho di supervishon i mantenshon di nos lei- i reglanan. Esaki basá riba e prinsipio ku kualke sosiedat di derecho demokrátiko ta goberná pa lei- i reglanan ku riba nan turno ta basá riba un prinsipio fundamental di no diskriminá. Den nos kaso aki na Boneiru no ta diferente. Artikulo 1 di nos Konstitushon ta dikta ku tur hende ta igual i ku no por diskriminá ningun hende pa ningun motibu. Den boka di pueblo nos ta bisa simplemente ‘lei pa un, lei pa tur’. Pa loke ta violashon di nos leinan, poko por pero sigur nos ta eksperensiando ku ta bai ta reinando un tipo di anarkismo den nos komunidat. Nos a kuminsá ta hasi kiko ku ta, ki ora ku ta i na unda ku ta. Anto esaki tin un kousa, esta falta di kumplimentu ku nos leinan i falta di konsistensia i kontinuidat den supervishon i mantenshon di nos lei- i reglanan. El a krese i ta kresiendo di tal forma ku outoridatnan den nos komunidat ta pèrdiendo kredibilidat, ta reina deskonfiansa i hende a kuminsá pensa i aktua den e forma ku si e por i no ta aktua kontra dje, mi tambe por antó no mag ni por aktua kontra mi. Un mentalidat totalmente robes ku ta kreando dia pa dia mas problema den nos komunidat.
No tur ora aplikashon severo di lei ta e solushon
E kaso ku a hala atenshon siman pasá ta e dak ku piskadónan a konstruí banda di e waf di piskadó na Playa Pabou. Segun informashon ofishal di parti di polis ta ku e dak ta trahá sin pèrmit i segun lei mester kit’é den 24 ora. Komo konsehal mi a bai serka e piskadónan konserní i a skucha nan banda ku hopi atenshon i mi a yega na e siguiente konklushon. Traha sin pèrmit ta ilegal, pero e solushon no ta tur ora aplikashon severo di e lei manera e ta skirbí. Un alternativa bon ta pa krea espasio pa korigí, sigur si e intenshon tras di e akto no tabata ni ta pa kometé krímen òf un òf otro maldat, sino eksplísitamente den e kaso aki ta pa drecha e fasilidatnan pa e piskadónan. Si ta manera e piskadónan a komprondé ku e motivashon pa kita e dak tambe ta pasobra e sitio ta ser usá pa uso di supstansianan ilegal i tambe tin hendenan ku ta kana riba e malekon tin molèster di malkomportashon di esnan sintá òf pará na e fasilidatnan, antó e medida di kita e dak no ta solushoná e problema aki. Den e kaso spesífiko aki, mi ta kere ku mester buska otro solushon i no un konfrontashon entre outoridat i e piskadónan. Ekspertonan di direktorado di Planifikashon i Desaroyo mester drenta den diálogo ku e piskadónan ei bou, revisá e dak i si mester adapt’é na nos reglanan di konstrukshon, instruí esnan responsabel pa hasi esaki den un tempu determiná i manda pidi formalmente pèrmit pa e konstrukshon.
Mester balorá sektor primario
Ku e problema aki a sali algu muchu mas importante na kla. Henter e waf di piskadó di Playa Pabou mester ser revisá pa loke ta trata su seguridat i mester krea fasilidatnan pa tur esnan ku ta usa e waf aki. Den esaki mi ta di opinion ku e organisashon di Piskadónan, PISKABON ku por sierto tin un kòntrakt di kuido ku Entidat Públiko Boneiru por hunga un ròl. Nos mester realisá na Boneiru ku nos mester balorá e sektor primario den nos komunidat, esta e sektor ku ta produsí kuminda. Ta trata aki di kunukeronan, kriadónan di bestia i piskadónan. Nos no por sigui trata e gremio aki komo no importante. Nos mester krea sirkunstansianan adekuá den kua e trahadónan aki por ehersé nan profeshon na un manera digno. Mester tin mas rèspèt pa e ofishinan akí i esnan ku ta ehersé e profeshonnan akí. Ta manera un piskadó a formul’é korektamente: “Nos ta lanta mardugá grandi, bandoná nos famia i subi laman ku tur su riesgonan pa bai buska kuminda pa nos mes, pero tambe pa nos komunidat. Ora nos sali ei, nos no sa ku nos lo bolbe. Ora nos regresá tera, nos ke trankilidat i fasilidatnan adekuá pa nos por sera nos dia ku un mente trankil.”
Momentu pa kuminsá di nobo
Pues mi ta hasi un yamada na tur esnan responsabel pa laga e loke a pasa ta e momento pa kuminsá di nobo i konstruí e fasilidatnan ku e piskadónan akí mester na e waf di Playa Pabou. A yega ora tambe pa Kolegio Ehekutivo yega na un manehadó di tur e wafnan di piskadó i tambe e slepweinan. Kisas por hinka esaki den e kòntrakt di kuido di PISKABON? Anto pa loke ta komportashon malu òf uso di supstansianan no permití: outoridatnan, hasi boso trabou manera boso a hura p’é, aktua i detené esnan kulpabel. I na e direktorado di Supervishon i Mantenshon di Lei: boso tambe hasi boso trabou manera boso a hura pe i rùim òp tur loke ta ilegal riba nos isla, naturalmente dunando e violadónan e oportunidat pa nan mes korigí den promé instansia i demonstrá nan sentido síviko. I abo òf boso ku ta kana ku e idea ku pasobra e otro a hasi malu i no a aktua kontra dje, pues abo tambe por hasi malu, kòrda ku dos malu no ta bira un bon. Kada ken karga su propio responsabilidat.