MinPres a skohe di no ta lesa dokumento
Den kontinuashon di reunion publiko riba CPR kaminda despues di 8 luna (19 yüni 2023 – kontinuashon 22 di febrüari 2024) Minister Presidente a bin kontesta preguntanan di parlamento.
Den kontesta Minister Presidente a indiká bon kla ku e no a lesa dokumento i ku e no tin tur informashon di loke ta pasando rondo di refineria. Kiermen despues di 8 luna ku Minister Presidente a pidi pa skòrs i bai lesa dokumento esaki tòg no a tuma lugá.
Na inisio di e reunion frakshon di MAN a pidi pa hasi “inzage” den e akuerdo ku RdK a firma ku PDVSA riba e debe atrasa i tambe risibi e lisensia pa loke sanshonnan Merikano. E proposishon aki a keda rechasa despues ku Minister Presidente a bisa ku si divulga informashon e akuerdo ta keda anulá.
Na final di e reunion Frakshon di MAN a sostené i entrega un moshon kaminda ta urgi gobièrnu komo akshonista laga SOAB hasi un investigashon riba legalidat i efektividat di desishonnan ku a tuma durante e proseso pa skohe operador di refineria.
Frakshon di MFK kual ta bai tras di e gobièrnu komo “rubber stem” a vota kontra i di e forma aki no buska klairdat pa pueblo i pa nan mes komo parlamentario.
Pa frakshon di MAN e moshon ta pa trese klaridat pa pueblo riba henter proseso pa buska operador di refineria. Transparensia i klaridat riba loke ta pasando ta nesesario. Nos no por sinta ketu i aseptá ku tur loke a pasa i diferente informashon ku ta bini dilanti, no ta trese klaridat pa pueblo.
Nos ta lamentá ku un investigashon pa trese klaridat ta kai den mal tera serka MFK. Loke nos por kompronde kada bes den e tipo di akshon di MFK ta, ku nan lema nan no por biba esaki si no papia so.
Nos ta kontentu ku e dos miembronan di koalishon di frakshon PNP si a kompronde e esensia di transparensia i klaridat pa Pueblo ku a vota PRO e moshon.