Dia 14 di februari 2024 a yega Aruba un delegacion di coleganan di Eerste Kamer aki na Aruba. Ta trata miembronan di “Vaste Kamercommissie voor Koninkrijksrelaties”. Di dianan 9 te cu 19 di februari e delegacion ta bishitando e 6 islanan den caribe. Ta usual cu na inicio di un periodo nobo, e miembronan ta haci e bishita aki, pa siña conoce coleganan, siña conoce e islanan, nan similaridad y diferencianan. Hopi importante ta pa nan tin of haya un mihor comprondimento di e situacion local di cada isla y por pone cosnan den contexto ora ta trata topiconan cu ta regarda nos islanan. Den e delegacion actual mayoria ta cara nobo, segun mi ta 4 so ta miembro pa algun tempo caba.
Parlamento di Aruba durante di un encuentro social a topa cu e delegacion. E actividad tabata na Kulture Café. Sigur un anochi caminda como parlamentario mi por a hiba combersacionnan hopi ameno cu mi coleganan. Mas cu claro ta siña conoce otro y hopi importante ta cu bo por comparti informacion di nos pais y kico tur ta nos logro y retonan.
Ami ta keda accentua cu e momentonan aki ta necesario pasobra cu un aspecto cu mi lo keda subraya constantemente ta e hecho cu hopi biaha mi ta haya cu nos coleganan falta di hopi informacion y conocemento di nos isla. Mientras hopi biaha nan ta esnan, cu na momentonan crucial, mester tuma decision riba puntonan cu tin un impacto pa nos isla a largo plazo. Nos no por lubida e temporada di pandemia. Mas cu claro nos ta agradecido pa tur yudansa ricibi for di Hulanda, pero un cos si mi a bisa durante e anochi aki, esta cu te dia di awe mi no por compronde e grado di condicionamento di e yudansa. Algo cu te dia di awe nos ta negociando.
Un ehempel sigur ta e refinanciamento di e debe cu nos tin cu Hulanda relaciona cu Covid y tur e exigencia/condicionnan cu Hulanda ta mara na esaki pa nos por haya un deal beneficioso. Dus pueblo por compronde cu un di e topico mas presenta pa nos di Aruba ta e strafrente y e exigencia di Hulanda pa regla supervision financiero via un Ley di Reino.
Mi tin cu bisa cu e anochi a bay hopi placentero y sigur lo mantene contacto cu algun di esnan cu mi a logra combersa cu nan. Sigur a resalta cu nan ta impreciona cu e grado halto y liher di recuperacion di nos isla y e maneho responsabel cu gobierno ta hibando. Tambe mi a sinti nan boluntad pa hunto cu nos sigui traha na bienestar di nos pais. Na juni lo tin reunion di IPKO na Hulanda y akinan sigur lo tin mas espacio pa tene dialogo y hiba discucionnan riba topiconan di importancia pa nos paisnan.
