Dialuna mainta Minister di Turismo y Salud Publico sr. Dangui Oduber conhuntamente cu Directora di ATA sra. Ronella Croes, a reuni cu un grupo di delegadonan di St. Maarten, Curacao y Suriname pa asina discuti varios punto cu a wordo estableci den e “contactplan” aña pasa entre e paisnan.
Minister Dangui Oduber a presenta den parlamento un presentacion di e actualisacion di resultadonan di turismo na Aruba y a discuti posibilidadnan di un cooperacion entre e islanan den tereno di turismo. Puntonan cu a wordo presenta ta: enfoke ariba un turismo duradero, desaroyonan di e pais, proyectonan di inovacion, portanan di entrada, desaroyo a base di datos.
Resultadonan a demostra cu for di e entrada di turismo lo sigui inverti ariba diferente mehoracionnan di e producto Aruba. Entre otro enfokando ariba atraccion pa turistanan, strategianan pa atrea mas turista afluente cu ta bin gasta hopi cen den economia di Aruba. Alaves diversificacion ta hunga un papel importante, maske e mercado principal ta bin di Merca, semper ta busca pa atrea turistanan di otro mercadonan manera di Latino America y Europa.
Minister Oduber a menciona cu e desaroyo y inversionan pa producto Aruba ta sumamente importante pa nos pais pa sigui inverti den mehoracion den nos infrastructura. Minister Dangui Oduber a menciona cu Aruba a experencia un crecemento grandi den desaroyo di hotel den e ultimo añanan y awo tin cu enfoka ariba un turismo sostenibel y duraduro, teniendo na cuenta nos naturelasa y tambe loke nos pais por soporta den cantidad di turista.
Minister Dangui Oduber ta expresa cu e delegadonan a keda impresiona cu e presentacionan y e resultadonan di turismo di Aruba y Minister ta sumamente optimista cu lo yega na un cooperacion y cu tin hopi oportunidadnan pa traha hunto den tereno di turismo. Minister Dangui Oduber ta expresa su gratidud pe bishita y ta spera cu pronto lo por ehecuta e ideanan aki di traha mas di cerca cu otro denter di e islanan di caribe.
