Detenshon pa manehá bou di influensia
Riba djaweps 15 di febrüari, alrededor di 8.15 or di anochi, a detené un hòmber di inisial E.J.d.J. di 72 aña di edat riba Kaya Korona pa manehá bou di influensia di alkohòl. E sospechoso tabata enbolbí den un aksidente entre dos outo riba un sitio di stashoná outo na Kaya Tintorero i tabata ke bandoná e sitio. Un persona ku tabata presente na e sitio a par’é. Durante un kòntròl por a nota vários karakterístika ku ta indiká ku e tabata bou di influensia di alkohòl. A dun’é òrdu pa hasi un tèst di supla pero despues di a purba tres biaha e sospechoso no por a hasi e tèst di supla i a detené. En konekshon ku resultado di un análisis di rosea ku a hasi kuné na warda di polis, a konfiská su reibeweis. No tabatin herido na e aksidente.
Kòntròl di tráfiko planiá
Alrededor di 12 or di mèrdia riba djaweps 15 di febrüari, a tene un kòntròl di tráfiko riba Kaya Internashonal. Aki a para i kontrolá 8 vehíkulo, di kua 1 skuter. Durante e kòntròl a resultá ku un di e vehíkulonan no tabata sigurá i e shofùr no por a mustra un reibeweis bálido. Pa e motibu aki e shofùr a haña but.
Riba djárason 14 di di febrüari, 5.30 or di atardi a tene un kòntròl di tráfiko riba Kaya Nikiboko Sùit. Aki a para i kontrolá 25 vehíkulo, di kua 12 shofùr a haña un but.
E butnan tabata pa lo siguiente:
11x pa manehá sin faha di seguridat bistí;
1x pa pa tene telefòn den man miéntras ta manehá.
En konekshon ku Dia di San Valentino, a sorpresá e shofùrnan ku a kore pasa ku un rosa komo èkstra atenshon riba e dia spesial aki.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Ladronisia di skuter
Riba djárason 14 di di febrüari a drenta keho di ladronisia di un skuter. E skuter ku no tabata na lòk, tabata stashoná den kurá di un kas situá na Kaya Gloria. Deskonosínan a bai kuné entre 2 or di mardugá i 6 or di mainta. Ta trata di un skuter koló pretu di marka Piaggio, tipo ZIP 50, ku plachi di number MF-3971. Ta investigando e kaso.
Detenshonnan
Riba djamars 13 di febrüari a detené un hòmber di inisial J.M.W. di 20 aña di edat en konekshon ku maltrato. E sospechoso tabata enbolbí den un bringamentu.
Alrededor di 11.55 or di anochi riba djamars 13 di febrüari a detené dos hòmber durante di e marcha di despedida di karnaval en konekshon ku maltrato. Nan tabata enbolbí den un bringamentu den besindario di stadion. Ta trata di un hòmber di inisial C.L.S.M. di 18 aña di edat i un hòmber di inisial J.S.P di 18 aña di edat.
Riba djamars 13 di febrüari, alrededor di 6.55 or di anochi a detené un hòmber di inisial C.A.O.V. di 66 aña di edat en konekshon ku menasa. E sospechoso a menasa un dama ku un machete durante di un pleitu.
Riba djaluna 12 di febrüari a detené un hòmber di inisial W.R.C. di 39 aña di edat en konekshon ku buracheria públiko i pa violashon di Lei di Identifikashon BES. E sospechoso tabata kousa molèster den kura di deskonosínan di dje. Durante di e detenshon e sospechoso no por a identifiká su mes tampoko.
Kòntròl di tráfiko plania
Den oranan di atardi riba djamars 13 di febrüari a tene un kòntròl di tráfiko plania riba Kaya Korona. Durante di e kòntròl aki a kontrolá un total di 16 vehíkulo, di kua 3 shofùr a haña un but.
E butnan tabata pa:
2x manehá sin seguro bálido;
1x manehá ku un reibeweis kaduká.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
Outo ta dal siklista
Riba djaluna 12 di febrüari un aksidente entre un outo i un siklista a tuma lugá riba e rotònde ku ta konektá Kaya Nikiboko Sùit ku Kaya G.F. Betico Croes i Kaya Kanari. Shofùr i e outo a deklará ku e tabata kier a sali for di rotònde subi Kaya Nikiboko Sùit bayendo den direkshon nort. E siklista tabata kore su dilanti. E shofùr di e outo a kere ku e siklista tambe lo a sali for di rotònde, subi Kaya Nikiboko Sùit den direkshon nort. Pero e siklista a sigui kore den rotònde bayendo direkshon di Kaya G.F. Betico Croes dor di kua e outo a dal e siklista. Ambulans a transportá e siklista pa hospital pa kòntròl i tratamentu médiko.
Parada di Karnaval
Durante e parada di karnaval na Playa riba djadumingu 11 di febrüari, polis a atendé ku tres establesimentu di hóreka ku tabata bende bebida den bòter di glas, despues di kua nan a kuminsá hasi uso di kùp di plèstik. Banda di esei a hasi un tèst di supla ku tur shofùr ku tabata forma parti di e parada di karnaval riba uso di alkohól, for di kua a resultá ku tres shofùr a konsumi mas alkohòl ku ta permití na momentu ku bo ta tras di stür. A sakanan for den e parada pa seguridat di tur presente. Ta importante pa menshoná ku promé ku e parada, a instruí organsadónan di karnaval pa avisá tur shofùr ku nan no por konsumí alkohòl tras di stür.
Detenshon pa destrukshon
Den oranan di mardugá riba djadumingu 11 di febrüari, a detené un hòmber di inisial C.L.B.S. di 25 aña di edat pa destrukshon. E sospechoso a destruí bentana i spil di un vehíkulo. Doño di e vehíkulo a entregá keho na polis i a detené e sospechoso.
Detenshon pa maltrato
Riba djadumingu 11 di febrüari, alrededor di 10.40 or di anochi, ‘meldkamer’ sentral a risibí notifikashon di un situashon kaminda un hòmber a maltratá un dama riba Kaya Tintorero. A detené e hòmber di inisial L.A.G.M. di 22 aña di edat pa maltrato. E sospechoso no tabata ke duna oido na òrdu di polis pa koperá ku su detenshon i tabata resistí fuertemente. Pa e motibu aki mester a hasi uso di forsa brutu pa realisá su detenshon.
Riba djadumingu 11 di febrüari, alrededor di 7 or di anochi un patruya na pia a detené un hòmber di inisial A.P. di 21 aña di edat riba Kaya Nikiboko Sùit pa maltrato. E sospechoso a maltratá un dama na altura di un establesimentu riba e mesun kaya. Ta investigando e kaso.
Ladronisia di dos skuter
Den oranan di mardugá riba djasabra 10 di febrüari, a drenta keho di ladronisia di dos skuter ku tabata stashoná dilanti di un establesimentu nokturno situá riba Kaya Prinsès Marie. Ta trata di un skuter koló pretu di marka Kymco tipo Agility i un skuter koló pretu ku maron di marka Sym tipo Orbit. Ambos doño tabata den un estrablesimentu nokturno i despues ku nan a sali pafó a tuma nota ku a hòrta e skuternan.
Bo a mira of tende algu? Bel 911 of 717 800 of e liña di tep anonimo 9310.
Aksidente Kaya Monsigneur Nieuwindt
Riba djasabra 10 di febrüari, alrededor di 8.35 or di anochi, un aksidente entre un outo i un pikòp a tuma lugá riba Kaya Monsigneur Nieuwindt. E outo a dal den un pikòp i despues den un palu di lus. Despues, e shofùr di e outo a sali for di su vehíkulo i a bandoná e sitio di e aksidente. Mientras ku polis a yega na e sitio i tabata atendé ku e víktima, e shofùr di e outo a bini bèk na e sitio. A detené e shofùr di e outo, un hòmber di inisial J.S.G. di 30 aña di edat pa manehá bou di influensia di alkohòl i a duné un but pa manehá sin reibeweis bálido, sin plachi di number i sin seguro bálido.
Teneerparade
Durante Teneerparade riba djabièrnè 9 di febrüari, a deskonosínan a kibra un barikada i mester a remediá e situashon durante e parada. Banda di esaki a baha dos hóben for di riba un stèp eléktriko pa motibu ku nan tabata kore den un área será pa tráfiko. Aparte di esaki e parada a bai trankil.
Kiebro den kas
Riba djabièrnè 9 di febrüari, alrededor di 10.50 or di anochi, ‘meldkamer sentral a risibí notifikashon di kiebro den un kas na Kaya Neerlandia. E habitantenan di e kas a deklará ku nan no tabata na kas na momentu di e kiebro i na momentu ku nan a yega kas nan a ripará ku a horta algun artíkulo. Esta algun prenda, un lampi i sèn kèsh. Ta investigando e kaso.
Kuerpo Polisial Hulanda Karibense ta hasi yamada na un i tur ku a mira òf ku tin informashon tokante e sospechosonan, pa tuma kontakto ku polis via 715 8000 òf via di e liña di tep 9310.
Aksidente entre outo i pikòp
Riba djabièrnè 9 di febrüari, alrededor di 7.30 or di anochi, ‘meldkamer’ sentral a risibí notifikashon di un aksidente entre un outo i un pikòp riba Kaya Nikiboko Nort. E shofùr di e outo a resultá heridá i ambulans a transport’é pa hòspital pa tratamentu médiko. For di investigashon ku e departamento di tráfiko di KPCN a hasi, a resultá ku e pikòp tabata kore mas duru ku e velosidat permití.
Aksidente entre skuter i pikòp
Alrededor di 12.50 or di mèrdia riba djabièrnè 9 di febrüari, un aksidente entre un skuter i un pikòp a tuma lugá riba Kaya Internashonal. E shofùr di e skuter a deklará ku el a pèrdè kòntròl riba su stür den un bògt i pa e motibu aki el a resultá ku su skuter riba e otro banda di kaminda. E shofùr di e pikòp ku tabata bini for di direkshon kontrali, a dal frontal den e skuter. E shofùr i e pasahero di e skuter tabatin un hèlm bistí pero a resultá heridá. Ambulans a transportá ámbos pa hòspital pa tratamentu médiko.
But pa violashon den tráfiko
Entre djaluna 29 di yanüari i djárason 14 di febrüari a duna vários but pa violashon den tráfiko durante di kòntròlnan rutinario.
Esakinan tabata lo siguiente:
5x pa manehá sin plachi di number;
4x pa tene telefòn den man miéntras ta stür;
4x pa manehá sin faha di seguridat bisti;
3x pa manehá den direkshon prohibí;
8x pa manehá sin hèlm bisti;
7x pa manehá sin seguro bálido;
5x pa manehá sin reibeweis bálido;
2x pa stashoná robes.
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.