Y asina nos paradanan grandi di Carnaval 70 tambe a pasa bula bay den e biento fresco cu tur su luho y buniteza bay drumi den laman pa spierta den un otro sonjo maraviyoso otro anja, Dios mediante. Nos por bisa tambe cu ela bay den e bunita bahada di solo unico den su color y splendor, poeticamente cu e grupo bunita luhoso Empire. E grupo bunita aki, na encargo di Beautiful Queeny Bergen y Mr. Carti y Elite y demas prestigioso patrocinadornan sponsernan, y nan comishonnan dynamico talentoso a luci masha masha bunita mes cu e color oranjo y mas den e tema di Bahada di solo. Locual nos por a wak na televishon a cay na nos agrado sigur. Lieve mooie Queeny, nos ta sigur cu bo prinsnan Kae y Kiaan y Nana a scucha bo saludos ! Pabien na Empire y tur e gruponan, boso tur a luci bunita y boso a sa di hasi bunita propaganda pa nos turistanan bishitante, cu nos isla ta un “One happy island” den e temporada di Carnaval sigur.( Nos no lo papia di nos isla su problemanan y su prijsnan aumentando, di e tantisimo hotelnan y autonan cu ta core ariba un isla asina chikito y falta di un verkeersplato of sleeping police den Dadelstraat y caminda di asfalt yen di buraco riba e caminda asfalta den Patiastraat cu un buraco peligroso ariba e acera.) Laga nos focus ariba algo otro, cu tambe ta algo bunita pa papia di dje. Esaki ta e dushi mainta celebra recientemente cu nos grandinan den Centro di Bario Noord, e tema di Dia di San Valentino. E simpatico ex sra. Carnaval di algun anja pasa, conosi tambe como nos Comediante femenio nr. 1 aki na Aruba cu su vocabulario pica tin biaha, pero cu un dushi y bon curason na e bon lugar. Si, ta di Angelique Stuger mes Lady Ruth ta papiando. Nos ta yamele “Angie”. Angelique ta e lider inspira talentoso y dynamico cu ta encarga cu actividadnan pa e grupo di grandinan aki, pa pasa un bon tempo hunto yen di alegria cu musica, un kopie koffie y algo dushi di pasa boca. Lady Ruth a wordo invita pa a bin recita algun poema di amor, locual nos gusta hasi, y nos a hasta canta un cantica tambe encuanto nos hende muhe. (Sin spera, Lady Ruth a corda riba un joke cu a pasa di berdad cu ne y ela comparti esaki tambe, pone un sonrisa mas ariba e caranan contento). Nos a canta e cantica, mirando cu dia 8 di Maart lo ta atrobe e Dia Internacional di Hende Muhe cu ta hanja atencion aki na Aruba tambe regularmente. Nos por a lesa riba facebook caba, cu nos flamante MP Evelyn Wever Croes ya a cuminsa laga su comishonnan cuminsa traha riba un otro conferencia interesante pa hende muhe e anja aki. Ya caba nos tambe tin e fecha aki reserva, pasobra, semper bo ta sinja algo nobo na e conferencianan aki. Nos ta contento cu nos a topa cu Randy, e Cupido di Amor na Centro di Bario Noord cu tambe sa conta chistenan pret pone tur hende hari un crenchi. Pa bin bek ariba e tema di Carnaval, Lady Ruth tambe ta un di esnan cu ta contento cu ta keda den pueblo mes cua cantica ta e Roadjam di e anja aki, pasobra, bo no por complace tur hende. Pa nos, y pa nos dushi bario di Dakota, e roadjam ta “D’a Fiesta” di Pader Jairo Maduro cu su Figaro Fiiiiiii, Figaro Faaaaaa, Figaro Fiiiiiii sin duda. E ta asina original y unico den letra y melodia sigur ! Dushi y contagioso cu su alegria !
Cada radio emisora lo scoge esun di nan naturalmente y probablemente tambe hendenan di smac ofzo, pero, manera nos a bisa riba facebook : Manera Claudius Phillips hamas ! Manera Lord Boxoe hamas ! Manera Ito Dania y Juancho Kock di Dakota hamas ! Pero Pader Jairo Maduro a steal the show tambe Diabierna anochi na Djiespies Happy Hours cu su tremendo cantica di Carnaval como e guest star sorpresa e anochi ey di Robert Maduro y su banda Azucar. Su dushi alegria a resalta atrobe. No ta pornada e ta expresa su alegria tambe den musica tocando su trompet den Kerki tambe, mirando cu ta un Dios tin cu ta den tur Iglesianan presente. Den tur Misa. Den tur Catedral. Den tur curason. “Make music, not war”.
Pa conclui nos relato, nos ta desea henter nos dushi pueblo di Aruba un siman dushi di Amor cu Dia di San Valentino ! Specialmente e amor entre pareha ! Un dushi siman di amistad entre amigonan tambe, cu respet di ambos banda. Un felis Dia di Amor y Amistad ! Danki pa lesa nos relato cu amor y atencion . Un bon resto di siman. Corda e amor ta cuminsa cu stima bo mes, pa bo por stima Dios y tur otro rond di bo. Un “Bearhug” grandi diki gordo pa nos lectornan !
