Frakshon di MPB a bin diskubrí ku Konseho Insular a regalá su mes ketu ketu asina, un montante di mitar mion di dòler èkstra pa aña. Nos frakshon a inisiá 2 siman pasá un investigashon i awor bin sali na kla ku na último momentu un hende a kambia e ordenansa ku kambio di kompensashon di frakshon den konseho insular, ku resultado ku esaki a bira dos biaha i mei mas haltu pa frakshon.
Ora a bai wak e montantenan bek ta bin mustra ku un frakshon di 3 asiento ta bai di $70.000 dòler pa un montante di $265.000 pa aña ku ta suma un montante di mas di 1 mion dòler den un periodo di gobernashon.
Investigashon ku prensa tambe a kuminsá hasi den e kaso akí ta duna indikashon ku di un forma straño Griffier di Konseho Insular lo a kambia e ordenansa pa hisa e montante nan ku frakshon ta haña. E pregunta ku ainda mester di kontesta ta ken a duna instrukshon pa hisa e montante akí?
E manera kon e proseso akí a kana ainda ta inkomprendibel pa nos di MPB i ta kontra tur regla di bon gobernashon i transparensia.
E subida akí ta inakseptabel i pa e rason akí frakshon di MPB ta hasi preguntanan dirigí na presidente di konseho insular i tambe na representante di reino. Di e forma akí pa nos ta spera di por haña klaridat kiko a pasa i ta ken e duna griffier e instrukshon pa kambia e montante ku finalmente un frakshon di 3 asiento a bira un frakshon mionario den un solo periodo di gobernashon.
Ta imposibel pa aworakí konseho insular pone e tipo di montantenan akí pa su mes turesten ku Boneiru tin situashonnan agudo di pobresa ku mester di atenshon pero tambe mester di atenshon pa nos kayanan i kasnan pagabel pa nos pueblo.
Di parti di MPB lo nos lo bai entregá un proposishon na konseho insular pa destruí e ordenansa akí i pa bin ku un proposishon hustu i aseptabel bèk riba mesa.