Tourism Corporation Bonaire (TCB), huntu ku 15 partner for di nos isla, tabata presente na e bolsa di buseo Duikvaker na Houten, Hulanda, dia 3 i 4 di febrüari 2024.
E aña akí e It’s In Our Nature ‘look & feel’ nobo di e Pavilion Boneiru a bria durante e bolsa ku a dura dos dia. Marjolein Oleana – Business Manager & Europe Liaison i Annette Emerenciana – Marketing PR & Projectcoördinator a representá e stènt di TCB. E partnernan di e Pavilion Boneiru pa e aña aki tabata AB-Dive, Captain Don’s Habitat, Chogogo Beach & Dive Resort, Dive Friends Bonaire, FPA Sports Bonaire, Grand Windsock Bonaire, Oasis Guesthouse Bonaire, Plaza Beach & Dive Resort, Scuba Do Bonaire, Scuba Elite Bonaire, The Hut Bonaire, VIP Diving, Wanderlust Duikcentrum i Wannadive Bonaire. Parti pafó di e Pavilion Boneiru, Buddy Dive Resort tambe tabata presente ku un propio stènt.
Dia 3 di febrüari e Pavilion Boneiru a organisá un happy hour i un evento di ret, kaminda diferente ekspositor, bishitante di e feria i partnernan di medionan di komunikashon a partisipá. E happy hour i e evento di ret a brinda un oportunidat úniko pa Boneiru pa engrandesé su visibilidat serka ko-ekspositornan i bishitantenan, miéntras nan tabata establesé kontakto ku vários skol di buseo, risòrt i kompania di hür outo di nos isla. E bishitantenan por a gosa di diferente sukulento snèk krioyo ku Cedric Soleana a prepará, i ku a fiha atenshon riba Boneiru su delisianan kulinario. Komo parti di e eksperensia gastronómiko, e bishitantenan tabatin oportunidat pa pruf i disfrutá di e dushi kòfi fresku tostá for di Boneiru, ku Bonchi Boneiru a spònser, i e bibidanan stèrki lokal di nos isla, Ròm Rincon i likor Cadushy, ku The Cadushy Distillery a spònser.
Durante e evento di ret, e tim di TCB a rekonosé Patrick van Brienen, e organisadó prinsipal di e bolsa di Duikvaker, komo embahador di Boneiru pa su sosten balioso den e industria di buseo pa nos isla Boneiru.
Dia 4 di febrüari e Pavilion Boneiru a klousurá e bolsa ku un último happy hour kaminda e studiantenan boneriano Alexander Tromp, Jeadan Crestian i Sabine Schleper, bistí ku trahe tradishonal folklorístiko, a sirbi un variedat di delisioso snèk krioyo.
E bolsa di Duikvaker a atraé en total 9500 bishitante, di kua hopi tabata konosé nos isla i su fantástiko bida bou di laman kaba. Otronan ya kaba a tende di Boneiru i awor akí ta anhelá pa dentro di poko plania un bishita na nos isla.
Pa medio di partisipá na bolsanan di vakansi i di buseo na Hulanda i Oropa, TCB ta spera di engrandesé e visibilidat i presensia di nos isla riba e merkadonan mas importante di Hulanda i Bélgika.
E siguiente bolsa di Duikvaker ta tuma lugá dia 1 i 2 di febrüari 2025 na Houten, Hulanda.
