E asunto aki a sali for di man, e cantidad di divorcio riba nos isla ta grandi, y mas ainda famia kibra, violencia relacional y domestico,adiccion na alcohol y droga, y abuso verbal y fisico, ta for di control.
Abandono di hogar a bira algo normal, tanto pa mayornan mes, como pa yuinan cu no por soporta e bida cu nan mayornan ta hibando.
Hopi mucha cu ta sera den prison no ta eyden pasobra nan a comete un delito solamente, pero nan ta eyden pa negligencia di nan mayornan, cu a prefera Adulterio, Adiccion y Abuso enbes di cria mucha decente y obediente..
Nos por yama e situacion aki e triple A, cual ta un situacion cu ta visibel den hopi famia.
Nos no mester lubida cu matrimonio no ta un contrato, pero un convenio entre Dios, un homber y un muher. Matrimonio a wordo institui pa Dios.Pasobra ta Dios a mira cu no ta bon pa e homber ta su so y e a dune un ayudante cual e por comparti bida ,cual Adam a yama muher pasobra e ta wesu di mi wesonan y carni di mi carni a wordo saca for di Homber ( Genesis 2:23).
Pesey e homber lo bandona su tata y su mama y lo uni cu su esposa y nan lo bira un carni,(Genesis 2:24).
E decadencia cu ta asotando nos aki, placa no por solucione, pasobra placa no ta bay yega, pa cubri pica, rebeldia y abominacion.
Hende a bira lomba pa Dios, pa moral, decensia y respet, y adapta nan mes na tur clase di inmoralidad cu por presenta den nan bida.
Esaki ta e consecuencia ora porta wordo habri pa pica.
Hende no tin solucion pe solamente Dios por tene misericordia, pasobra a yega tempo pa hende bolbe bek na Dios.
No lubida locual Señor a bisa;
Si mi pueblo cu a wordo yama na mi nomber, humiya nan mes y haci oracion, y busca Mi cara,y bira for di nan mal camindanan,e ora ey lo Mi tende for di cielo, y lo Mi pordona nan pica y cura nan tera.
( 2 Cronicanan 7:14)
Caminda Adulterio, Adiccion, Abuso, Abandono ta presente den un hogar, e hogar ey ta destina pa caba na nada, y ta solamente cu intervencion di Dios e por wordo rescata.
Ta hopi tristo pa tende con hombernan casa. ta cobra dia 24 por ehempel, nan ta disparse y keda mas cu ocho dia for di cas, y ora nan bin cas bek , nan ta blo bashi,sin ningun cen pasobra tur e placa a bay na adiccion.
Y tambe ta conta pa hende muhe, cu tur dia ta makiya mas bonita posibel, pero tras di e makiyahe aki ta sconde un gran adiccion, pasobra fin di luna tin cuenta di droga pa paga, prome cu cumpra cuminda pa cas.
E situacion ta mas alarmante cu nos ta pensa , y mester di un intervencion rapido, pa asina nos por logra salba un gran cantidad di famia cu ta envolvi den e situacion penoso aki.
Nos mester bolbe bek na arepentimento, oracion y pidi Dios, tene misericordia di henter e isla aki, nos mester pone orguyo un banda, y dobla nos rudia dilanti di e Todopoderso.
Laga cada ken cu ta envolvi den Adulterio, Adiccion y Abuso, arepenti y pidi yudansa di Dios urgentemente, pasobra famia y yiunan ta cos di balora, no ta cos di haci wega cune.
E enemigo no ta respeta,( Juan 10:10) pesey nos tin cu balora locual Dios a duna nos.