No ta for di awo pero for di basta tempo caba tabatin diferente problema den e departamento di DIP (Directie Infrastructuur en Planning) . Sinembargo a cuminsa structura despues cu Haime Croes a wordo “suspendi” sinembargo na vispo di casi 1 aña nada no a cambia den e departamento, e tempo ey nos por corda cu a argumenta cu DIP tin un deber pa cumpli cu ne cu ta e retrasonan cu tin y esaki e director Haime Croes no tabata cumpli cu ne, Tin varios persona tin cantidad di aña ta warda y hasta nan a tuma caminda di corte pa haya nan derecho of pa nan keda atende y pa nan por haya un contesta.
Hopi di e procesonan ta bay hopi slow y tambe hopi malo, EA News a bin ta informa esaki desde un inicio di tur e comerciantenan cu ta yega na mesa di redaccion y ta conta nan frustracion di e mal maneho den DIP y con nan a keda perhudica. Awe casi 1 aña despues comercio ta mes caminda para.
DIP tin un papel hopi grandi pa desaroyo di Pais Aruba y e desaroyo aki a keda frena debi cu e director di DIP e tempo ey Haime Croes no ta capas pa e posicion como director di DIP y e la demostra esaki den varios ocasion unda cu a ocasiona diferente blunder y cu tin un cantidad grandi di casonan den corte cu lo costa Aruba hopi placa.
Si no atende cu e casonan aki Aruba ta esun cu ta keda perhudica paso lo mester paga pa e mal trabao cu ambtenaarnan y mal decisionnan cu a keda tuma den DIP pa perhudica desaroyadornan local. Ta un berguensa cu Arubianonan mester lucha y di otro banda stranheronan ta haya “voorkeur” y nan si ta bay dilanti riba e pida baranca aki cu no ta di nan y historia lo conta unda cu na final nan lo chupa Aruba y beneficia nan Pais mandando placa afo y despues cu nan bira grandi bay bek nan raiz, algo cu Arubianonan no ta compronde of no kier compronde paso nan ta dies mira e beneficio di awe y no e efecto di mañan. Cada rasa lo bay bek na nan Raiz, pero e daño ya a wordo haci. Un berdad cu hopi no kier mira.
Casonan actual cu tin den corte ta muestra cu e director di DIP no tabata capas pa e posicion cu e tabata bin ta eherciendo den tur e añanan na DIP y ta ocasionando problema so den e departamento y pa Pais Aruba unda cu e economia a keda paralisa pa su motibo, Awo ta puntra minister di infrastructura si realmente e problema tabata mr Croes?
Despues cu mr Croes a bay pues 9 luna pasa ni un optie no a wordo saca of behandeld cu excepcion di e optie di SHIMARUCU REAL ESTATE VBA cu a haya 40 camber di hotel atrobe pa traha na Sero Colorado aki ta trata di e mes un grupo de Venezolano di Royal plaza, Blue Azure y harbour house Aruba cu no ta local.
Mientras un yiu di tera hamas lo haya un privilegio asina laat staan pa wordo contesta door di e departamento. Un efecto cu awe ta sinti dushi , pero mañan lo yora malay. Nos ta halsa stranhero y preta Arubiano pa mañan nos mes yora malay.
Mientras cu DIP no a contesta niun peticion of bezwaar commercial nos mester para keto riba un decision importante den HOF unda DIP tin un responsabilidad di contesta. Ta trata aki di e famoso Fictieve weigeringen unda ta referi na situacionnan unda cu gobierno no ta responde na tempo na un solicitud of obhecion de un ciudadano. Un problema comun na Aruba.
Por ehempel, si ciudadano solicita un permiso of impone (bezwaar) un decision, e gobierno mester contesta dentro di un plaso determina. Si el gobierno no haci esaki y no a produci ningun afwijzing oficial, ta trata di un “fictieve weigering”
Na diferencia di Curaçao y Sint Maarten, “fictieve weigering” na Aruba ta considera un “afwijzende beschikking” pa e rason ey e hues a dicta cu un bezwaar “meteen inhoudelijk kan worden behandeld”. De minister heeft – hoe paradoxaal het ook lijkt – immers beschikt, door niet te beschikken.
Pues ta un iresponsabilidad grandi di parti di DIP no contesta bewaar y solicitud nan di ciudadano pues dia di mañan ta henter Aruba por cuminsa lanta caso nan na LAR hincando Land Aruba den mas schade y problema financiero cu nos tin caba.
Minister di infrastructura a viola tur Algemene beginselen van behoorlijk bestuur habido y por haber den e periodo aki no a tene cuenta cu Zorgvuldige voorbereiding.
Na momento di prepara un decision, E Minister competente mester identifica tur factornan y circunstancia relevante. Tur esaki mes ta hunga un rol na momento di tuma decision.
E minister competente mester conoce tur factor di interes di e peticionario. Asina ta estableci den artikel 3:2 van de Algemene wet bestuursrecht (Awb) na momento di presenta un verzoek, Minister den e caso aki DIP mester tin conocemento suficiente di e solicitud di e peticionario si esaki no ta e caso, e solicitante por ainda suministra informacion cu falta.
Na momento cu e minister competente conoce tur echos, factor y interes e ta yega na un decision. Asina e ta estableci den artikel 3.4, eerste lid van de Awb.
Den un caso di tekortkoming of “fictieve weigering” , un hues por ordena un investigacion mas profundo di e factnan y interes di solicitante. E Minister of departamento competente lo mester tuma un decision nobo.
Pues e smoesje di keda sin contesta no ta sinta mas den e pueblo di Aruba. Na final e mandatario ta esun cu ta keda responsabel aunke e pasa e mandato pa e departamento, asina e ley ta bisa.
Actualmente comercio di Aruba no sa mas ken pa kere si cada 6 luna Minister di infrastructura ta sali cu un declaracion cu funcionario nan di DIP ta trahando cu cuerpo y alma sin resultado.
Segun algun di nos Fuentenan DRH por a compronde cu den DIP hurista nan a traha duro pa traha tur peticion cu respet, derecho y abase di ley, pero top ambtenaarnan den cas di DIP specificamente den e area comercial, no ta colaborando of miho dicho cumpli cu su trabao manera mester ta.
Sinembargo papia su bon of malo waarnemend directeur tambe a tarda pa tuma accion, na momento cu tin top ambtenaar cu no ta entrega trabou manera mester ta y esaki ta influencia un departamento publico y ta perhudicando Land Aruba, ambtenaarnan mester cuminsa carga nan consecuencia y strafmatregeling mester tuma luga.
No por ta posibel cu un ambtenaar ta traha cu kier y ta stanca un comercio cu mester drey. Ley di Prestatiemanagement ta na vigor y hopi den DIP lo hiba un dike 0
Indicacion tin cu top ambtenaarnan ta sinta pafo despues di trabao cu politiconan opositor y tin probablemente un agenda. Banda di esaki por a compronde cu mirando cu minister di infrastructura a duna mandato na e departamento na top amtenaaren di DIP awe por mira cu ambtenaarnan inmadura no por ni traha riba nan mes pa por pone un departamento drey manera mester ta pa comercio di Aruba sigui bay padilanti y mirando esaki tampoco e mandatario concerni no ta tuma accion, pero ta saca su curpa afo cu a duna e mandato, pero na final su persona mes ta keda responsabel, manera ley ta percibi.
Pues e idea di e mandato di Minister di infrastructura no a duna fruto ni e resultado manera cu e mandatario a spera, sinembargo pueblo ta keda paga salario di un ambtenaar cu ta Hefe di departamento comercial cu no ta trahando manera debe ser, un minister di infrastructura y di un director na cas cu ta cobra salario sin traha, e pregunta di milon ta, ken ta bay tuma over e barco sin capitan sin rumbo aki?
Hefe di departamento comercial tin 9 luna sinta ta gana su salario cu pueblo ta page sin traha pa Aruba, loke cu e la huramenta pe. E departamento aki no a saca net net nada comercial, paso e no tin vision pa traha of no kier traha. Esaki tin DIP paralisa completamente y tin comercio di Aruba perhudica.
E tarea di hefe di departamento comercial no ta uno facil, pero no ta uno cu mester dura añanan pa keda traha, mester voeruit e consehonan y e MB nan na momento cu e file ta cla. Na momento cu tin un decision di e director tin cu controla y verifica y hinca e consehonan bon den otro pa asina traha e MB (Ministeriele Beschikkingen) pa asina e director por firma como gemandateerde di minister.
Fuente nan den DRH a informa nos cu DRH tambe a keda poni na altura y cartanan tambe a wordo dirigi pa e departamento sinembargo hopi informacion referente esaki nos no tin ainda pero EAnews lo sigui e desaroyo aki di cerca y den e proximo dianan lo sinta cu diferente comerciante cu acerca nos y kier vocifera riba nan caso den corte paso no lo keda keto mas.
Tambe tin diferente ciudadanonan cu ta confrontando problemanan financiero severo debi cu nan no por refinancia nan cas na banco debi cu DIP no a contesta nan solicitud pa verlenging erfpacht. Ta papia aki di un gran cantidad di peticionnan. EA News tin diferente cita cu diferente ciudadano den e dianan nos dilanti.
