Ban integranan den nos comunidad y no simplemente ignoranan
Durante conferencia di prensa di Plataforma Nos Pais, Otmar Oduber a indica cu mescos cu 12 aña pasa a reinventa nos turismo, a yega e momento pa reinvente un biaha mas.
Aruba mester pone atencion urgente na e calidad di nos producto y calidad di nos turismo., pasobra producto Aruba ta bayendo atras, incluyendo e calidad di servicio, mientras cu tin mester di miles di hende pa traha.
Aki Oduber a bin cu un punto sumamente interesante y cu sigur lo mester haya atencion den e Dialogo Nacional proponi pa Plataforma Nos Pais, ta trata di ilegalnan riba Aruba. E ta bisa cu tin alrededor di 12 mil ilegal na Aruba, pero ningun hende kier atende cu e tema aki. E personanan aki ta trahando tur caminda na nos isla na un forma ilegal sin paga AZV, SvB, belasting, sin tin un cuenta di banco. “Ban cuminsa documenta e hendenan aki, laganan cuminsa paga y participa. Bin cu reglanan cu por ehempel ta bisa cu ta bay legalisa e 12 mil ilegalnan, pero pa nan por haya nan permiso, durante e prome 3 añanan nan mester pasa un curso di Papiamento, di Ingles y Aruba Certification Program. Ban integranan den nos comunidad y no simplemente ignoranan”.
E personanan aki tin mas cu 10 aña bibando ilegal, nan yiunan a nace na Aruba bayendo scol cu residentenan legal ta pagando y ora nan bira malo e mesun residentenan legal aki ta paga pa nan haya tratamento medico. Lamentablemente, tin miedo pa atende cu e tema aki.
Mientras tanto tin mester di miles di hende pa traha. Recientemente tabatin un job fair, pero manera Plataforma Nos Pais ta bisa, esnan cu ta acudi na esaki ta personanan cu tin trabou caba y ta buscando un miho trabou, pasobra e 12 mil ileganan no ta yega pasobra nan tin miedo di yega. “A yega momento cu gobierno mester para den su sapato y bisa ‘nos ta bin cu un pardon regeling. Por ehempel, ta bin cu un periodo unda si por demostra cu un persona ta trahando pabo ilegal, bo ta documenta e persona aki, ta firma pe y ta burger’e in na Aruba. Ta dune cursonan, lague siña Papiamento y Ingles como condicion pa e haya su permiso y asina ta yuda soluciona e problema di labor cu nos tin na Aruba”, Otmar Oduber a declara.
El a conclui expresando cu ohala e palabranan aki por yega na e 21 miembronan di Parlamento, pasobra si no atende cu e tema di calidad di nos producto awe, nos lo bay yore den futuro.