Den un sala completamente yen e lider di AVP, mr. Mike Eman a presenta e directiva nobo di Fundacion Mito Croes. Durante e ocasion aki e Presidente nobo di e hala scientifico, John Hart, a duna un elequente discurso di e motibo cu e como profesional a accepta e reto grandi y importante aki. John Hart a expresa preocupacion cu e ultimo seis anjanan Aruba a perde e rumbo y espirito di progreso, innovacion y traha a base di vision.
Fundacion pa Estudionan Social Cristian Mito Croes ta e fundacion cu tin como meta pa haci envestigacionnan relevante pa maneho di nos pais. E ta forma parti di e organisacion grandi di partido AVP. Desde su creasion den añanan 90 ela haci un cantidad di envestigacion y a organisa un serie di reunion di reflexion cu expertonan y directamente cu ciudadanonan di Aruba. Antes e fundacion tabata conoci como FESCA. Na 2017 a adopta e nomber di e ex-politico, hurista y academico dr. Mito Croes. Durante su existencia ‘Fundacion Mito Croes’ a haci envestigacionnan cu a resulta den desicionnan crusial pa nos comunidad y posicionnan politico na fabor di nos comunidad. Hopi di e envestigacionnan a wordo publica, manera e nota “DOÑO DI NOS PROPIO DESTINO” di mr. Mito Croes y dr. Tico Croes, cu a forma e base scientifico cu argumentonan legal y politico pa yega na kita e fecha di independencia cu tabata ancra den Statuut for di 1986. Den cooperacion cu e instituto Wetenschappelijk Instituut / WI di partido CDA di Hulanda, bao liderazgo politico di mr. Mike Eman y guia scientico di dr. drs. Arjen Alberts y mr.drs Richard Arends a haci envestigacion y a produci raportnan cu a forma e base pa e maneho di Gabinetenan Mike Eman I y II den e periodo 2009-2017. “Economische Ontwikkeling van Aruba”, “Economische Ontwikkeling van Aruba: deelstudie Energie”, “Infrastructuur van Aruba” y “Deelstudie Masterplan Oranjestad” tabata djis algun di e estudionan aki.
E director nobo di FUNDACION PA ESTUDIONAN SOCIAL CRISTIAN MITO CROES, e hoben sr. John Hart a accepta e funcion importante aki den e fundacion cu un discurso elocuente den cual e a bisa entre otro: “Den e ultimo 6 aña nan un biento di cambio a supla ariba nos pais. Pero no nesecariamente un cambio pa mihor. No pa un cambio cu a contribui na un mihor calidad di bida pa nos ciudadonan. E cambio ta mas tanto bisto den e polarisacion riba nos pais, den un desconeccion entre un maneho di gobierno y e bida y sentimento diferente di pueblo. E decadencia ta bisto den diferente partinan den nos comunidad, mayornan trahando dos trabou ku resultado ku hopi hoben tin falta di atencion y guia, pobresa cu ta aumentando riba nos pais y nos grandinan ta bibando ku e preocupacion ku nan calidad di bida dia pa dia ta bai mas atras.”
Cu esey e hoben Sr John Hart, a mustra e importancia y relevancia di tur loke e fundacion lo bay haci pa e maneho di nos pais. Aunke e fundacion ta funciona independiente di partido AVP, e relacion politico ta bon cla: sostene un otro maneho di nos pais cu ta dirigi riba re-conecta tur parti di nos pais na sirbi e BON COMUN, e interes y bienestar di henter nos pais. Sr. John Hart a mustra bon cla riba esaki durante di e instalacion di e directiva nobo. Sr. John Hart: ”Ta momentonan manera awe den e sala aki, cu ta contribui na un sentido di refleccion pa un cambio di direccion. Pasobra ningun sociedad por florece sin un formulacion collectivo di e Bon Comun. E directiva nobo di Fundacion Mito Croes a acepta e reto pa e caminda nos dilanti enfoka ariba re-conecta nos comunidad”.
Den e luna y añanan nos dilanti lo por lesa e resultadonan di e trabou di Fundacion pa Estudionan Social Cristian Mito Croes di partido AVP pa bolbe crea bienestar den nos pais.
