Tourism Corporation Bonaire (TCB) a partisipá aktivamente na un dia spesial di aktividat ku Scholengemeenschap Bonaire (SGB) a organisá. Un kolaborashon pa konektá ku hóbennan lokal den un tayer inspirativo i kreativo, kaminda sostenibilidat a para sentral.
Intenshon di e dia di aktividat na Parke Tului tabata pa brinda e studiantenan un oportunidat úniko pa ekspresá nan mes pa medio di arte. Cristely Cranston, branding- and content marketing coördinator na TCB, a bini ku e inisiativa pa e tayer i den esaki a pone énfasis riba importansia di rekreashon, reflekshon i haña konekshon di nobo ku naturalesa. Su entusiasmo pa kreatividat a kondusí na e idea pa usa e arte di pintamentu komo medio pa ekspreshon propio i konsiensia tokante medio ambiente.
Durante e presentashon a rekordá e studiantenan riba e lema di Boneiru ‘It’s In Our Nature’, ku tin un nifikashon dòbel. E ta simbolisá Boneiru su bunitesa inherente i ta reflektá e manera di biba di habitantenan di nos isla, i ta mustra ku meskos ku bonerianonan di naturalesa ta saludá otro, biba na un manera sostenibel tambe ta ankrá den nan identidat.
A enbolbí e tema sostenibilidat den e tayer pa medio di konsentrá riba palu ku ta drif subi kosta, un rekurso natural ku ta presente na abundansia na kostanan di nos isla. E studiantenan a siña tokante e prinsipionan di Blue Destination – e konsepto pa uso di rekurso natural pa kresementu, bienestar i desaroyo ekonómiko. A konsientisá nan di e echo ku por usa rekurso natural pa aportá na e kresementu ekonómiko i desaroyo kolektivo di nos isla.
Durante e evento e artista Norwin (Nòchi) Coffie tabata presente, kende a guia e partisipantenan atraves di algun método kreativo, di manera ku nan por a prosesá nan vishon riba e palunan ku a haña kantu di laman.
Partisipashon di TCB na e tayer pa arte sostenibel a ilustrá su dedikashon na promoshon di kreatividat, konsiensia ambiental i enbolbimentu sosial serka nos hóbennan boneriano.
