Si un hende ta traha henter un luna y fin di luna e ta ricibi mitar salario e no ta keda contento.
Si bo auto ta traha 50% bon , bo no por bay keur e auto, y lo ta dificil pa subi caya cune.
Si bo matrimonio tin solamente 50% di fieldad ta nifica cu bo no tin felicidad matrimonial.
Si bo dak di cas ta 50% bon esey ta nifica cu ora awa ta cay bo tin problema.
Si bo salud ta solamente 50% bon,esey ta nifica cu cada rato bo ta na dokter.
Si bo chick/guy bisa bo cu e ta stimabo 50%, bo tin di puntre na unda e otro 50% ta bay.
Si bo ta sinti bo 50% homber y 50% muher ta tempo pa arepenti y busca Dios.
Si bo ta haña les na scol pa solamente 50% , ta dificil pa logra un diploma.
Si bo organonan den bo curpa ta funciona solamente 50%, bo tin un bida desagradabel.
Si bo yuinan biologico ta stima bo 50%, ta tempo pa haci oracion pa nan.
Si un yiu ta tende di su mayornan 50% so, kiermen e yiu ey ta rebelde.
Si bo tin solamente 50% di confiansa den un persona, ta dificil pa bo confia e persona.
Tur cos den nos bida, nos ta desea of exigi pa nan ta funciona 100%, pa asina nos ta sigur y nos bida tin stabilidad. Tur hende ta busca stabilidad den nan salud y stabilidad spiritual.
Tur hende kier avansa den bida, ningun hende kier trompica tur momento cu nan kier haci algo.
Tur locual nos haci na mitar awe, mayan lo demostra un falta di interes grandi cual ta conduci na mediocridad.
Si nos no pone 100% atencion , na nos yuinan for di ora nan ta chiki, na grandi nan ta bira dificil pa coregi, pasobra na chikito mayornan a los laga bay, y awor na grandi awa di wowo ta cay.
Pa locual ta trata nos Dios Todopoderoso ta para scirbi : y Hesus a contesta: Stima Señor bo Dios, cu henter bo curason,y cu henter bo alma,y cu henter bo mente. ( Mateo 22:37).
Ta imposibel stima Dios y stima mundo , ta imposibel stima Dios y keto bay ta mara na cos di mundo.
Ta imposibel bisa cu nos ta stima Dios, y nos ta keto bay mara na inmoralidad, orguyo, arogancia, y falta di pordon.
Ora nos ta biba den un situacion asina , nos ta gaña nos mes, pasobra nos Dios ta puro y santo y e no ta acepta ningun clase di bagamunderia. Tur locual hende sembra nan lo cosecha, ningun hende no por gaña Dios.
Nos bida ta un cosecha di locual nos a sembra y ta sembrando, pesey si nos kier un cambio, e cambio mester sosode den nos curason, y ta solamente ora nos entrega nos curason na Cristo Hesus un cambio berdadero lo tuma lugar.
Hopi hende kier biba mitar bida den Cristo, y esey no ta posibel, pasobra esun cu ta sali perhudica ta bo mes,dia y tempo lo demostra cu bo no ta berdadero, pasobra na bo frutanan hende lo conoce bo.
Ta imposibel pa un hende cu di berdad ta stima Dios, bira lomba pa Dios, y bay participa den cosnan di mundo, pasobra den cosnan di mundo Dios no ta agrada, Dios no tin parti den buracheria, paranda y perversion.
A yega e tempo pa para keto y tuma un decision, den cual nos ta sirbi Dios cu henter nos curason.
Ta dificil pa biba dos bida.