Diasabra Minister Maduro tabata tin e placer di a haci apertura oficial di Diamonds International su tercer filial na Aruba situa na Paseo Herencia. Pa e ocasion aki Minister Maduro a hiba palabra den cual a cuminsa na felicita e doño y personanan cardinal den e operacion exitoso di Diamond International na Aruba kendenan ta, sr. Moshe Hakimi, Regional Manager, sr. Luis Valverde, Regional Financial Controller, sr. Lyndon Evans, Regional Brand Manager, sra. Nathalie van Trikt, Regional Marketing Manager y sr. Rishi Chabbria, Island Manager.
Esaki ta e di tres sucursal di Diamonds International na Aruba y pa e motibo aki Minister Maduro a gradici e famia di Diamonds International pa nan confiansa y aprecio pa Aruba.
E mandatario a acentua den su discurso cu banda di e 4 C cual ta carat, color, claridad y corte di un diamante, lo mas importante ta e C di cordialidad di e trahadornan di Diamonds International. Cu nan bon servicio nan ta pone local y bishitante sinti e calor di Aruba y aprecia e bunitesa di e diamantenan. E trahadornan di Diamonds International ta e diamantenan di mas balor y pesey mester cuida nan bon.
Minister Maduro ta desea e famia di Diamonds Internacional hopi exito cu nan tercer filial na Aruba. Masha danki pa kere den Aruba.
