Di tur banda nos hubentud, ta wordo ataca, cuminsando pa e falta di responsabilidad di mayor caminda tin hende cu no ta tuma e tempo pa disiplina nan yiu for di chikito, ta laga cos bay for di man, y na grandi ta lamenta, pasobra si un palo crece dobla, e ta bira bira dificil pa pone bek stret.
E technologia y ciencia avansa,caminda hende nan cu mente maligno a drenta y ta instrui muchanan den mal caminda pa medio di technologia y ciencia.
E internet cual ta e medio di comunicacion mas rapido di mundo, y e telefon, cu nos tur a pensa cu lo obra pa bon, a resulta cu nos como mayor mester tene bon cuenta cune, pa asina avisa nos yiunan, pa nan huse pa bon, y no pa trece confusion y pleito.
Tur esaki ta poco compara cu e nivel di inmoralidad, cu ta aumentando na nivel mundial, y cu ta hala nos hubentud bay cune den scuridad, y hasta trata di domina nan mente cu perversidad y abominacion, pa asina aleha e hubentud for di Dios.
Un biaha mas nos kier corda tur mayor cu ta dificil lanta yuinan den e tempo trabahoso aki sin Dios,pasobra e dianan ta malo, y nos mester haci bon uso di e tempo.
Leynan ta cambiando y ya tin cierto paisnan caminda nan kier limita autoridad di mayor y duna e mucha mas derechi pa e por dicidi pa su mes, y rechasa locual su mayornan ta bisa.
Poco poco mas libertinahe ta drenta mundo caminda e berdad di Dios ta wordo rechasa y e maldad y inmoralidad di mundo ta wordo apoyo , acepta, y leynan ta wordo cambia, pa gara y mara e hubentud den scuridad.
Nos como mayor mester usa e recurso di mas poderoso cu nos tin cual ta oracion, pasobra Dios mes ta manda nos humiya nos mes, haci oracion, busca Su cara y bira for di nos malcamindanan , E lo scucha for di cielo y pordona nos pica y sana nos tera. ( 2 Cronicanan 7:14).
Boso hobennan mescos sea sumiso na boso ancianonan, y boso tur, bisti boso mes cu humildad pa cu otro, pasobra Dios ta resisti, e orguyosonan , ma ta duna gracia ma e humildenan.
Humiya boso mes anto bao di e man poderoso di Dios, pa E por halsa boso, na e tempo apropia, tirando tur boso preocupacion riba dj’E pasobra E ta percura pa boso.
Sea sobrio, sea alerta. Boso adversario e diabel , ta cana rond manera un leon cu ta gruña. Buscando ken e por devora. Ma resisti , firme den boso fe, sabiendo cu boso rumannan den henter mundo. Ta pasando den e mesun experiencia di sufrimento.( 1 Pedro 5:5-9).
Dios pa medio di su inmenso amor den Su palabra,ta avisa e hobennan cu di berdad e enemigo ta nan tras, pesey nos como mayor mester haci tur esfuerso, pa guianan den caminda di Señor.
Nos mester haci oracion pa nos hubentud por wordo salba.(1 Pedro 3:8-9).
Pa hubentud por stima e palabra di Dios ( Salmo 119:9-10)
Pa hubentud keda den iglesia ( Hebreonan 10:25)
Pa hubentud tin discernimiento ( 1Corintionan 10:1).
Pa hubentud por bringa contra tentacion( 1 Corintionan 10:13).
Pa hubentud tin amigonan cu ta stima Dios.( Prov 18:24).
Pa hubentud tin bon relacion ( 2 Corintionan 2:22).
Pa hubentud por ta e lus di mundo.( Mateo 5:14-16).
Pa hubentud por para pa e berdad di Dios.( 2 Timoteo 3- 4-5).
Pa hubentud por haci cosnan grandi den nomber di Señor (1 Timoteo 4:12).