Sindicatonan ta tardando deliberacionnnan di indexering. Ya desde 25 di October, 2023, Gobierno diAruba, por medio di Minister President Evelyn Wever-Croes a invita sindicatonan SEPPA, SPA, SADA, TOPA, SIMAR, y FTA pa forma un comision pa traha riba indexering. Esaki a base di palabracionnan cu a haci entre Gobierno di Aruba y Sindicatonan ya na November aña 2019. Despues di e fecha aki, e comission no por a cuminsa traha pa motibo cu e pandemia mundial Covid a bati na nos porta y e prioridadnan a bira diferente.
Sinembargo na October di aña pasa, Minister President a pidi sindicatonan pa retoma e tema aki y ehecuta e decreto cu a wordo traha na aña 2019 y pa hunto traha riba un solucion structural di indexering.
Prome Minister a enfatisa cu Gabinete Wever-Cries kier soluciona e discucion riba indexering una vez por todas. Pasobra sindicatonan, manera ta conoci, cada tanto tempo ta subi caya pa exigi indexering, Esaki, segun Prome Minister, no mester ta asina. Tin costo di bida cu a aumenta y Gobierno di Aruba asina tin pa compensa su trahadonan.
Pero ta importante, Prome Minister ta enfatisa, pa yega na un formula con pa adresa esaki unabes y pa semper. Pa e motibo aki tambe, Gobierno a institui un comision consistiendo di expertonan di Gobierno y sindicatonan, pa asina hunto bin cu un proposicion con pa atende e tema di indexering sin cu sindicatonan bay den accion cada biaha pa motibo di indexering.
“Lamentabelmente, sindicatonan no a duna oido na e invitacion aki di Gobierno desde 3 luna pasa y ainda sindicatonan no a indica kendenan lo representa sindicatonan den e comision.
Mientrastanto, Prome Minister a invita sindicatonan pa un reunion pa mira kico ta e problema di traha den comision y lo aclarea esaki durante di reunion. Importante ta, Prome Minister a enfatisa, cu como doño di trabou, Gobierno ta carga su responsabilidad y kier haci esaki en conhunto cu Sindicatonan. Gobierno di Aruba ta spera cu sindicatonan bin na mesa pa papia tocante indexering y con pa regla esaki una bes por todas pa asina tin trankilidad y siguridad pa tur trahado den e aparato gubernamental.
