Turista ta fayesé
Riba djaweps 11 di yanüari, alrededor di 11 or di mainta, ‘meldkamer’ sentral a risibí notifikashon tokante un turista di un barku krusero ku a bira malu miéntras e tabata snòrkel na altura di e sitio di sambuyá Andrea 2. A hiba e víktima kantu ku boto kaminda personal di ambulans mesora a dun’é asistensia i a transport’é pa hòspital pa tratamentu médiko. Despues di yegada na hòspital lamentablemente e víktima a bin fayesé. Ta trata di un turista maskulino di inisial G.D.M. nasé riba 2 di mei 1963 na Estados Unidos.
Aksidente Kaya Nikiboko Sùit
Riba djárason 10 di yanüari, alrededor di 5 or di atardi, un aksidente entre dos vehíkulo a tuma lugá riba Kaya Nikiboko Sùit. Na yegada di e patruya a resultá ku un outo a dal tras di un otro outo. Shofùr di outo 1 no por a wanta brek na tempu ku konsekuensia ku e vehíkulo a bai dal tras di outo 2. Shofùr di outo 2 a resultá levemente heridá i ambulans a transport’é pa hòspital pa tratamentu médiko. Ambos shofùr tabatin nan dokumentonan na òrdu.
‘Generator’ na kandela
Riba djárason 10 di yanüari, alrededor di 11.45 or di mainta, ‘meldkamer’ sentral a risibí notifikashon tokante un kandela na un kas den un kunuku na Kaminda Tras di Montaña. Na yegada di e patruya a resultá ku un ‘generator’ tabata na kandela den kurá di e kunuku. E agentenan huntu ku e persona ku a raportá a purba paga e kandela ku un slan di kurá te na momentu ku brantwer a yega na e sitio pa paga e kandela. Ningun persona no a resultá heridá.
Bringamentu ta terminá den hinkamentu
Riba djaluna 8 di yanüari, alrededor di 5.15 or di atardi, ‘meldkamer’ sentral a risibí notifikashon tokante un kaso di hinkamentu na altura di un bar na Kaya C.D. Crestian na Rincon. Despues di un investigashon a resultá ku tabatin un bringamentu entre tres persona durante kua a hinka un hòmber ku un opheto. Despues di e insidente, e sospechoso a bandoná e sitio. A transportá e víktima ku un outo personal pa hòspital pa tratamentu médiko. Ta investigando e kaso.
