Awe nos ta coba un crenchi den nos bahul di recuerdo di 2023. Nos no a alcansa di traha riba un relato pa fin di anja 2023, pesey nos ta pone un crenchi di luz ariba un bunita actividad cu a tuma lugar den Centro di Bario y Deporte Dakota, na final di 2023 , ora cu musica dushi di aguinaldos y gruponan tipico a deleita un dushi publico presente den nos Centro di Bario den Dakota tur dia, tambe cu un dushi Dande. E dushi musica aki a alegra mas e curasonnan, pa hunto cu nos dushi hendenan di Dakota tur dia, a celebra e bunita y dushi homenahe brinda na dos di nos baluartenan di nos bario. Dos gentil cabayero amigo di otro fei hopi anja y tur dos cu nan talentonan musical cultural y profeshonal.
Nos ta papiando di Papito Rafael y Eric Rincones. Nos conose Papito na e nomber aki aunke e tin un nomber oficial tambe naturalmente. Pero, pa nos e ta y ta keda Papito Rafael, tocador di varios instrumento musical, hopi conosi pa su tocamento di wiri cu e banda cu semper a companja Juan Chabaya “Padu” Lampe, tempo di tempo di Padu, awe den felis memoria. Nos tambe a hari cu smak, ora nos a tende tur locual Papito a hasi y pasa aden pa cu su pasion di tocamento cu a cuminsa e.o. ariba hemchi cu palo y despues riba e drumset di su ruman Eric Bubu. Ta otro genio musical cu su nomber di carino, Eric Bubu, esposo guapo di un di nos bunita Reinanan den Dakota, Ruby Lake. E anochi aki den CBDD e tremendo maestro di ceremonia a repasa e bida talentoso musical di Papito y di meneer Eric, cu segun e informacionnan menciona no ta di Dakota, Meneer Rincones a lanta den otro bario, pero a duna les na scolnan den Dakota y ta wordo accepta y considera como un di nos dushi hendenan di Dakota pa tur su tempo, amor y dedicacion duna na nos muchanan. Un shon di hende cu a duna di alma y curpa na yuda forma nos muchanan di Dakota, un bario multicultural tin biaha un crenchi complica. Pero, ta hopi bon hendenan profeshonal nos dushi bario di Dakota a produci danki tambe na tur e otro bon maestro y maestranan na e scolnan Pius X y Fatima College di anjas, entre nan e dynamico y lieve Juffrouw Glenda Richardson-Kelly y ainda nos por corda Meneer Eddy Jacobs, dfm, tremendo maestro ! Nos flamante ministro di cultura Sra. Xiomara Maduro a papia masha masha bunita mes di e dos baluartenan , Sra. Maduro bisti den un bistir sumamente alegre tropical hopi bunita mes. Cu bunita briyo y luz riba su cara y den su bunita wowonan. Su bunita curason cultural a papia. E mihor pareha bailador di Aruba, ya caba un crenchi di edad, pero masha lenig mes, cu por wordo mira den casi tur districto y of na club Nautical, ora tin fiestanan dushi bailabel, Betto y Helen a “ steal the show” cu nan bunita movecionnan elegante y alegre ariba e pista di baile. Ta un placer y dushi vitamina alegre pa wowo y curason mira y sinti nan pasion y alegria ariba e pista.
Te akinan nos prome “duik” den nos bahul di recuerdo di 2023. Danki pa lesa nos relato cu atencion y curason. Pa esnan cu mi no a topa, un Bon 2024 colma di salud, alegria, paz, amor, felicidad, y un curason humilde yen di gradicimento pa bida y pa tur cos ! Nos lo sigui duna nos lectornan un dushi “bearhug” den 2024 tambe. Un dushi “bearhug” di Lady Ruth !!!
