Ultimo biaha cu Aruba a experiencia un incidente riba e tereno di Refineria di Aruba (RdA) tabata día 25 di januari 2010 unda cu V3AR a pega na candela. Ta despues di casi 14 aña, cu lamentablemente Aruba ta pasa door di un susto semehante. Diaranson ultimo, dia 10 di januari 2024 pa 10 or y 11 di mainta San Nicolas a keda impacta pa un explosion hopi fuerte. E explosion aki a tuma luga den cura di “warehouse” riba e tereno di nos refineria. Un vacuumtruck a rementa durante un trabou andando riba tereno. Den e suceso tres persona a resulta herida. Inmediatamente e ekipo di emergencia a activa y a tuma control pa mitiga e situacion.
RdA na mesun momento a instala un ekipo interno pa conduci un investigacion profundo. Na e momentonan aki ainda e investigacion ta tumando luga cu e obhetivo pa sali na cla kico exactamente a sosode y na mes momento pa percura cu ta cumpli cu tur procedura, manera mester ta den refineria y pa esaki no ripiti mas. Pa locual ta trata e tres victimanan, RdA a keda monitoria cada un di nan situacion y por comparti cu comunidad di Aruba cu tur tres ta stabiel. E tres personanan envolvi ta un peaton, e chauffeur di truck y su ayudante cu tabata como pasahero. Pa locual ta trata e peaton, despues di control medico, e por a bay cas di biaha. E chauffeur a keda un día pa observacion, pero tambe ya caba ta na cas bek. E ayudante, cu ta e di tres herido den e incidente, ta esun di mas grave. Pero nos ta contento di por comparti cu e ta den un situacion stabiel y a sali for di I.C.U. pero ainda ta bou di observacion.
Ta importante pa informa comunidad cu, no obstante e suceso, no a afecta e distribucion di producto y no tin daño na infrastructura cu por tin efecto di interupcion di distribucion pa Aruba. RdA NV ta comprometi na tuma tur medida necesario pa evita ripiticion di un incidente similar den futuro y garantisa siguridad riba su tereno, pa su empleadonan y pa comunidad. RdA ta gradici tur cu a activa mesora, e ekipo di First Responders di RdA, FMSA y TdEA, e ekipo completo di siguridad, tambe Cuerpo Policial Aruba, Brandweer, Ambulance, Imsan, HOH, DTI y BRA. Refineria di Aruba N.V. ta gradici tambe comunidad completo di Aruba y specialmente pueblo di San Nicolas cu a convivi cu nos den e suceso aki. Nos pensamentonan ta cu e personanan herida y nan famia durante e periodo di recuperacion. Nos lo mantene comunidad informa pa medio di comunicadonan oficial manera e investigacion yega na su conclusion.
