Militarnan di Kòrsou for di 11 di desèmber 2023 te ku 7 di yanüari 2024 a asistí Kuerpo Polisial Kòrsou durante e operashon “Ta basta awor”.
E asistensia Militar a dirigí su mes riba mengua kriminalidat relatá ku arma di kandela i halsa siguridat riba e isla. Den un esfuerso konhunto ku KPC, militarnan di Kòrsou a ehekutá patruyanan, a pone puntonan di kòntròl mobil, i a apliká ‘blue light prevention’ prevenshon pa medio di lus blou, pa asina halsa visibilidat riba kaya, bou di e outoridat di Ministerio Públiko.
Durante e puntonan di chekeo di vehíkulo, diferente vehíkulo a keda kontrolá, loke a resultá den intersepshon di diferente arma i droga. Banda di esei a parti but, i KPC a konfiská vehíkulonan.
“Ta basta awor” a keda desplegá riba e isla durante e periodo drùk aki, ya komo e periodo aki hopi biaha ta bai kompañá ku un oumento di delinkuensia, pa motibu di un kantidat haltu di aktividatnan finansiero. Durante 27 anochi i mardugá, kada anochi a desplegá 12 Militar di Kòrsou, semper den koperashon ku KPC. E militarnan di Kòrsou mes no tin outorisashon pa investigashon.
E asistensia duná ta kai bou di e di tres tarea prinsipal di Defensa den Region Karibe Hulandes; duna sosten na outoridatnan sivil. Ku esaki Defensa den Region Karibe Hulandes ta kolaborá ku siguridat na Kòrsou.
