Aruba a conoce su prinsnan y panchonan pa Carnaval 70. Diadomingo 7 di januari, a tuma luga e eleccion Prins y Pancho 2024 pa categoria infantil, hubenil, grandi y adulto. Prome Minister Evelyn Wever-Croes a corona prins y pancho grandi y adulto.
E prins cu panchonan pa Carnaval 70 ta:
Prins y Pancho Infantil:
Arnond Malmberg y Javen Jansen, Prins Caya Pidi y Pancho Caya Haya
Prins y Pancho Hubenil:
Cayle Vis y Edan Geerman, Prins 70 y Pancho Na Benta
Prins y Pancho Grandi:
Samuel Winklaar y Jerwin Mercera, Prins Show y Pancho Time
Prins y Pancho Adulto:
Anthony Dijkhoff y David Simon, Prins Klap y Pancho E
Prome Minister ta gradici tur e participantenan, e coachnan cu a prepara tur participante pa eleccion di Prins y Pancho. Tambe e mandatario ta gradici mayornan cu ta sostene nos hobennan pa asina mantene e parti di cultura aki.
“Nos ta celebrando 70 aña di Carnaval na Aruba. Esaki ta algu cu nos pueblo mester ta hopi orguyoso di dje. Pa hopi pais rond, Aruba ta un ehempel grandi pa e manera cu semper nos ta celebra nos fiesta cultural, nos Carnaval. Ban hunto demostra mundo henter cu Aruba sa di celebra nos Carnaval na grandi”, Prome Minister a expresa durante su discurso chikito na e evento di Prins y Pancho.
Gobierno di Aruba no por keda sin recorda nos pueblo cuida durante e temporada carnavalesco. Mientras nos ta mustra mundo con bunita nos ta celebra nos Carnaval, nos mester tambe tene cuenta cu e respet na otro y siguridad, especialmente di nos muchanan, ta na prome luga.
Pabien na nos Prins y Panchonan di Carnaval 70. Pabien Aruba y feliz Carnaval 70. Danki na SMAC, na lidernan di grupo, musiconan, organisacionnan y carnavalistanan en general cu ta engrandece nos Carnaval.
