Lo bo warda den pas perfecto, esun cu su pensamento ta permanece den Bo, pasobra e ta confia den bo. Confia den Señor pa semper,pasobra den Dios e Señor nos tin un Baranca eterno.( Isaias 26:3-4).
Pasobra Dios no a duna nos un spirito di temor, sino di poder, y di amor y di sano huicio.( 2 Timoteo 1;7).
E mente di hende ta planea su caminda,ma Señor ta dirigi su pasonan.( Proverbionan 16:9).
Ta masha importante ora nos ta confia Dios den tur cos, y riba tur cos, pasobra asina nos por yega na e mente cu Cristo Hesus kier pa nos tin, pasobra asina Dios por guia nos pasonan.
Nos confiansa den Dios ta fortifica nos bida spiritual, pasobra for di eynan tur nos relacion cu Dios, ta crece y nos por declara su palabra cu confiansa den nos bida, y den bida di otronan.
Hende no por biba cu duda den Dios, pasobra esnan cu no ta kere den Dios ta bira juguete di satanas, pasobra nan no tin stabilidad den nan bida, nan tin falta di fe, pasobra nan no tin confiansa den Dios.
E enemigo ta contento ora e topa hende asina pasobra e por haci cu nan manera e kier, pesey ta hopi importante pa un persona cu ta den un situacion asina ey, habri su curason y invita Cristo Hesus bin biba den dje,y asina drenta un relacion serio cu Dios, caminda e enemigo mester distancia su mes.
Actualmente rond mundo nos ta mira con e confiansa den ciencia y technologia ta aumenta, hende kier imita Dios, pero esey no ta bira posibel si no tin confiansa den Dios.
Ora nos tin confiansa den Dios, nos por drumi trankil anochi, sabiendo cu Dios ta cu nos y cu nada lo pasa cu nos.
Ta masha peligroso ora duda ta domina curason di hende, pasobra sin fe ta imposibel agrada Dios.
Duda no ta laga hende avansa spiritualmente, y hasta den trabao diario duda ta stroba trabao, pasobra bo no por tuma un decision corecto ora bo ta duda.
Y duda no ta bini di Dios, Dios ta exigi confiansa den tur locual cu nos ta haci. Pasobra nos Dios ta Todopoderso, e por tur cos pesey nos mester confia den Dios, y duna tur Gloria y honor na Dios.
Pablo a bisa; No cu mi a alcansa esaki caba, of cu mi a bira perfecto caba, ma mi ta haci tur esfuerso pa mi por gara e loke pa cual mi tambe a wordo gara door di Cristo Hesus. Rumannan mi no ta pretende cu mi mes a gare caba : ma un cos mi ta haci : lubidando locual ta keda atras y aspirando na loke ta dilanti, mi ta haci tur esfuerso pa alcansa e meta, pa haña e premio di e yamada celestial di Dios den Cristo Hesus.( Filipensenan 3:12-14).
Esnan cu no tin pleno confiansa den Dios,no por avansa na e nivel cu Dios tin pa nan bida, pasobra mas confiansa nos tin mas grandi e ministerio pa cual nos a wordo yama lo crece, pasobra nos no por usa Su nomber si nos no tin confiansa den Su poder.
Pedro y Juan a usa e nomber di Cristo Hesus y un paralitico a lanta y cana, pasobra nan a realisa cu e confiansa den nomber di Hesus tin mas balor cu oro y plata.
Tur esey ta demostra na nos cu ora nos kere y pone nos confiansa den Cristo Hesus cosnan grandi lo sosode.
Pasobra pa Dios nada lo ta imposibel
