Dios ta alerta tur hende, tin ta haci manera nan no kier tende, y tin no kier tende at all, pero nunca rechaso di hende , por cambia e boluntad perfecto di Dios.
Den Lucas 21: 32-33 ta para scirbi: Di berdad Mi ta bisa boso , e generacion aki lo no pasa, prome cu tur cos tuma lugar.Shelo y tera lo pasa , ma Mi palabranan lo no pasa.
Den 2 Pedro 3 :7 ta para scirbi: Ma e shelonan y e tera actual pa medio di Su palabra ta wordo reserva pa candela, warda pa e dia di huicio di hendenan impio ( malbado).
Lucas capitulo 21;34 Tene cuidao pa boso curason no ta carga pa causa di paranda y buracheria y e preocupacionnan di bida, y e dia ey no bini diripiente riba boso manera un trampa. Pasobra e lo bin riba tur esnan cu ta biba riba superficie di henter mundo. Sea alerta tur ora bay , haciendo oracion pa boso, por tin forsa pa scapa di tur e cosnan aki, cu ta bay tuma lugar, y para dilanti di e Yiu di hende.
E unico manera pa nos por drenta shelo ta pa medio di Cristo Hesus kende ta e unico berdadero mediador entre Dios y hende.
Dios den Su inmenso amor a hacie posibel pa nos bisando den Juan 3:16 : Pasobra Dios a stima e mundo asina tanto, cu E a manda su unico Yiu pa ken cu kere den dj’E no bay perdi ma tin bida eterna.
Locual Dios a haci pa nos ta provee un salida pa nos di locual ta bay pasa cu e mundo.
Hopi hende ta haci wega, pero un cos nos tin sigur cu e dia di berdad por yega un ora pa otro, y pesey e evangelio di e reino di Dios mester wordo predica tur caminda ( Mateo 24:12-14), pa ningun hende por tin un excuus, pasobra esun cu rechasa Cristo Hesus aki na tera, lo wordo rechasa pa Su Tata cu ta den shelo.
No ta nada pa spanta hende, pasobra e enemigo no kier pa hende spanta cu maldad, pero si hende lo spanta ora nan tende di e huicio di Dios, cu lo bini pa tur hende. Y e ta bini inespera pasobra tur cos a wordo avisa caba, y tur porta ta habri ainda ,pa esnan cu kier arepenti, y acepta Cristo Hesus como nan Señor y Salbador.
Ya nos tin parada of marcha, of manifestacion di esnan cu a laga e enemigo gaña nan pa bay contra Cristo y su palabra, contra principionan y naturalesa di Dios. Tur esnan cu tin wowo mester mira.
Apoyo na maldad, inmoralidad y abominacion ta wordo demostra abiertamente, pasobra hende a perde temor pa Dios.
Dios no ta bay cambia, locual cu E a bisa, pasobra Dios su palabra ta fiel y berdadero, locual Dios a bisa lo tuma lugar.
Pesey nos lo mester tene bon cuenta cu locual ta para scirbi den 1 Timoteo 4:1-2: Ma e Spirito ta bisa claramente cu den e ultimo temponan algun lo cay for di fe,door di paga atencion na spiritonan engañoso y doctrinanan di demoño, pa medio di hipocresia di gañadornan, kende nan mes consenshi a wordo kima , como sifuera ta cu hero cayente esaki a wordo haci.
Awor tur hende ta comprende dicon tin hopi hende ta sigi den maldad,inmoralidad y abominacion aunke cuanto nan tende e palabra di Dios. Nan ta rabia y tuma esnan cu ta bisa e Berdad na malo.
