E buki di Santiago of Hacobo capitulo 4 ta splica tocante di somete boso mes na Dios, cual ta algo hopi importante den nos bida pasobra sometemento no ta algo, cu nos por djis papia di dje, pero ta algo cu nos tin di biba pe.
Pa nos somete na Dios, nos mester tin un entrega completo na Dios, den cual Dios ta na prome lugar den nos bida,y nos bida ta wordo dirigi pa Dios.
Pasobra hopi hende ta papia di Dios, pero nan tin miedo di biba pa Dios,nan tin miedo di entrega completo. Kibra amistad cu mundo, pasobra amistad cu mundo ta enemistad cu Dios.
Ta tempo pa hende bira serio cu Dios, pasobra kada ken cu kere cu e por biba dos bida, ta haci bofon di Dios, y ta gaña su mes, y lo carga e consecuencia di su rebeldia .
Ora nos ta somete na Dios, nos ta scucha , obedece, y sigi Cristo Hesus nos Señor y salbador.
Ora nos ta somete na Dios, orguyo no por ta parti di nos bida,pasobra Dios ta resisti orguyo.
Ora nos ta somete na Dios nos ta fiel na Dios pasobra nos sa cu Dios ta fiel y berdadero.
Ora nos somete na Dios , Dios mes lo traha un trankera rond di nos pa proteha nos.
Ora nos somete na Dios, nos bida lo ta dirigi pa Dios,pasobra nos confiansa ta den Dios.
Ora nos somete na Dios , nos ta demostra humildad, pasobra hende humilde ta ricibi gracia di Dios.
Ora nos somete na Dios nos ta resisti e diabel, pasobra mas pega cu Dios mas proteha nos ta.
Ora nos ta somete na Dios , nos no por paga malo cu malo, pasobra esey no ta boluntad di Dios.
Asina e enemigo mira cu un persona ta someti na Dios, e tin di pidi Dios permit pa e mishi cu e persona, pasobra e persona ey ta propiedad di Dios.(Job Capitulo 1y2).
Sometemento na Dios ta drecha bida, karakter, actitud y hasta integridad di un persona.
Den nos hobenanan nos ta mira cu nan sa poco di sometemento na Dios pasobra nunca nan mayornan a para riba esey. Hopi hende ta bisa nos no por obliga un mucha pa sirbi Señor, pero e diabel ta abusa di nos hubentud, cu droga, gang y arma.
Un hende cu ta somete su mes na Dios ta un hende determina pa sirbi Dios, cu no ta bay tras di amistad, tampoco idolatria, ni tampoco bruheria, su boca ta constantemente yena cu alabansa, y su curason ta carga cu oracion y palabra di Dios, pa yuda esnan den necesidad.
Ora nos ta somete na Dios, ta demostra un entrega completo, un arepentimento genuino,un bida aparta, y dedica na Señor.
Señor lo hala serca tur hende cu ta somete na dj’E, pasobra e ta stimanan y nan ta demostra confiansa den Dios,nan no ta haci nada sin consulta cu Dios prome.
Tur locual nan ta pidi nan lo haña , pasobra nan no ta cudisha cos di otro , pero ta warda cu goso riba locual nan a pidi Dios, y nan ta biba pa medio di fe pasobra nan sa cu esun cu ta spera riba Dios, semper lo tin ganashi y victoria.
Nan ta completamente na altura cu pega na Hesus nos ta logra tur cos , pero leu for di Hesus nos no ta logra nada. Hesus a bisa Ami ta e berdadero mata di wijndruif pega na Mi boso por tur cos.( Juan 5:5).
