Ta para scirbi den 2 Timoteo 2 ;9 ; Sinembargo e fundeshi firme di Dios ta para, seya cu e inscripcion aki: Señor conoce esnan cu ta di dj’E y laga tur esnan cu ta menciona e nomber di Señor abstene for di maldad.
Pasobra tur esnan cu ta scucha y lesa locual bijbel ta bisa y no ta hacie of mihor bisa no ta pratica, tampoco cana den e boluntad di Dios ta nan mes nan ta gaña ( Santiago 1:22).
Lucas 6:46-47 Hesus ta splika bon cla bisando: Y pakico boso ta yama mi Señor, Señor y no ta haci loke Mi ta bisa.Ken cu bini serca Mi y tende Mi palabranan y haci nan , lo Mi mustra boso cu ken e ta igual.
Obedencia na Dios ta trece sabiduria den bida di hende, mas obediente un hende ta na Dios, mas structura su bida Spiritual ta , y su crecemento lo ta visibel pa tur hende.
Tene bon cuenta con Dios a saca Hose for di prison, yena cu sabiduria di Dios y hacie gobernador di Egypto.
Y mescos tambe Dios a yama David for di tras di tou di carne y hacie Rey di Isreal.
Dios a duna rey Salomon cu no tabatin conocemento di gobernacion, sabiduria cual te dia di awe no tin ningun otro rey cu por compara cune.
Tur e hendenan aki a fortalese nan relacion cu Dios, den tempo dificil, den tempo trabahoso, mescos cu nos por recorda e tempo di Noe, caminda e pensamento di hende tabata draai rond di maldad so y Noe a haña gracia dilanti di Dios.
Mi stima esnan cu ta stimami y esnan cu buscami cu diligencia lo hañami.( Proverbionan 8:17).
Señor ta serca esnan cu ta sclama na dj’E , serca di tur esnan cu ta sclama na dj’E di berdad.
E lo cumpli cu e deseo di esnan cu ta tem’E, tambe E lo tende nan sclamacion y lo salbanan,( Proverbionan 145:18-19).
Hala serca Dios, y e lo hala serca boso. Limpia boso mannan boso pecadornan, y purifica boso curason, boso di curason dobbel.( Santiago 4:8).
Ta tempo pa busca Dios di henter nos curason, tempo pa fortalese nos relacion cu Dios, tempo pa oracion,ayuno, tempo pa scucha Bos di Dios y sigi conseho cu ta bini for di e palabra di Dios.
Tempo pa busca Dios, pa nos hogar, nos famia, nos negoshi y mas cu tur cos pa bienestar di nos pais.
No ta tempo pa corre tras di hende, tras di idea di hende y tras di boluntad di hende, tras di ideologia di hende, pasobra hende ta manera yerba un rato e tey despues e ta seca y no tey mas.
Dios ta yama nos pa para manera Hose ,Elias, Eliseo, Daniel, Juan Bautista,y laga tin den nos e actitud cu tabatin den Cristo Hesus y para pa Su palabra.
E tempo mes lo demostra e exigencia spiritual di parti di Dios, pa nos por experiencia intimidad cu Dios aki riba tera.
Ta tempo pa para firme manera homber, y depende riba Dios, y solamente riba Dios, nos no por come for di dos mesa, ni tampoco cana den dos caminda.
Gloria den Su nomber santo, laga curason di esnan cu ta busca Señor ta contento. Busca Señor y Su fortalesa busca Su cara continuamente.(1 Cronicanan 16:10-11).
Aña 2024 lo ta un aña cu nos lo mira movecion y sinti e presencia di Dios fuertemente ora nos busce di henter nos curason.