Djabièrnè 22 di desèmber último Movementu Kousa Promé tabatin un enkuentro públiko ku eksperto di CARICOM Chief Dr. Eric Phillips.
Dr. Phillips ta vice-presidente di Komishon di Reparashon di CARICOM i presidente di Komishon di Reparashon di Guyana.
Dr. Phillips a papia di kolonialismo kontemporáneo ku no ta respetá e derechi di outodeterminashon di pueblonan. El a bai spesífikamente riba kolonialismo i sklabitut hulandes, ku pa historia ta un di mas kruel na mundu. E ta mira sklabitut komo e promé bòm nuklear i rasismo komo e di 2 bòm nuklear.
Pa loke ta e despensa, Dr. Phillips a bisa pa tene kuidou ku pidimentu di despensa di parti di kolonisadónan. E despensa di Hulanda ta duna muestra di insinseridat, indiferensha i sentido di superioridat di rasa blanku. E pregunta ta kiko Hulanda ta pidi despensa p’e i ta ken Hulanda ta pidi despensa. Siendo ku Hulanda a kolonisá Guyana mas ku 200 aña, Hulanda no a pidi Guyana despensa. Hulanda no a pidi desendientenan di esnan sklabisá na Brazil, ni na New York ni na Afrika despensa. Den kaso di e islanan di ántes Antia, Hulanda ta kolonisando nan ketu bai.
Dr. Phillips a asentuá ku despensa no por bai sin reparashon. CARICOM a krea un Plan di Reparashon di 10 punto pa paisnan miembro. Realisando ku e plan di reparashon ta aplikabel pa e paisnan ku ya ta independiente, CARICOM a amplia e Plan ku algun punto mas pa kubri e paisnan den Caribe ku no ta independiente. CARICOM ta para pa dekolonisashon di henter Caribe.
Presidente di Kousa Promé drs. Ellen Maduro-Jeandor den su diskurso a enfatisá ku kolonialismo ta base di sklabitut, rasismo i tur e atrosidatnan ku esaki a trese kuné. Kolonialismo ta e fundeshi di krímen kontra humanidat. Tantu e despensa di gobièrnu hulandes i e pordon di Rei Willem Alexander ta “bakoba pa kue makaku”. Despues di despensa i pordon, Hulanda a sigui kolonisá Kòrsou normal. For di 1634 Kòrsou ta kolonia di Hulanda. Na 1954 a duna Kòrsou algu di outonomia. Na 10-10-10 a mina outonomia di Kòrsou gravemente ku introdukshon di 5 lei di reino. Na 2023 a bin e Onderlinge Regeling ku a debilitá nos outonomia aun mas. Hulanda tin Kòrsou totalmente kolonisá. Hulanda no ta respetá resolushon 1514 di Asamblea General di Nashonnan Uní. Pa loke ta trata reparashon, Kousa Promé ta eksigí pa stòp kolonialismo di nos teritorio. E derechi di outodeterminashon ta na promé lugá. Dekolonisashon promé ku tur kos. Ora ei Kòrsou lo eksiguí reparashon.
Kousa Promé por mira bèk riba un enkue
