Ta para scirbi den 2 Timoteo 3 :1-9 con hende lo cambia y bira mas stimado di nan mes cu stimado di Dios. Hende lo busca fama pa nan mes y no kier duna gloria na Dios. Hende ta bira asina materialista cu nan no tin cuenta cu prohimo, simplemente ta usa e slogan moderno cu ta bisa “ami ta bon” sin tene cuenta cu interes di otronan.
Den tur locual nos ta haci den nos bida, nos mester haci boluntad di Dios, y asina nos ta evita di drenta den caminda di scuridad y maldad.
Den e oracion di Nos Tata , ta para scirbi : laga Bo reino bini, Y Bo boluntad sea haci. Esey ta nifica cu nos ta compronde cu Dios tin un reino y e boluntad di Dios mester tuma lugar den Su reino.
Pa nos ta participante den Su reino nos mester duna honor, gloria, amor,respet y temor na Dios.
Tene cuenta e boluntad di Dios no ta pa nos:
Ta venga, kibra otro, papia malo di otro.
Bebe burachi causa daño na nos mes y na otro nan.
Biba den adulterio y inmoralidad.
Laga yuinan bandona pa nan cuenta pa asina nos por fiesta.
Aplaudi y apoya maldad y inmoralidad pa mantene amistad y sirbi propio interes.
Neglisha coreccion y disiplina di nos yuinan.
Rebelde y murmurador y mal agradeci.
Ora nos ta duna Honor y Gloria na Dios,nos ta haci lo siguiente:
Nos mester arepenti, kere y acepta Cristo Hesus y biba pa Señor.
Nos mester haci oracion ,alaba y glofica Dios constantemente.
Nos mester stima Dios riba tur cos, y nos prohimo mescos cu nos mes.
Nos ta honra nos tata y nos mama, cual ta e prome mandamento cu promesa.
Nos mester corda cu nos curpa ta tempel di Dios y cu e Spirito Santo di Dios ta biba den nos.
Nos mester stima nos esposa/esposo y trata nan semper bon den e amor di Señor.
Nos mester stima coregi, y displina nos yuinan pa lanta cu bon karakter y integridad.
Nos mester biba bon cu otro, pordona, y laga los for di cosnan bieu.
Nos mester sali for di tur locual tin holor na inmoralidad y corupcion, y aparta for di maldad.
Nos mester tin dominio propio y asina nos bida financiero ta cana den bon direccion.
Nos mester biba den Santidad na Dios, y laga tur locual cu ta sensual y sexy un banda.
Nos mester presenta tur nos peticionnan den oracion dilanti di Dios, cu gradicimento.
Nos mester ta fiel na Dios tanto den hecho como den palabra.
Ora nos menciona e cosnan aki , bo ta haña cierto hende lo bisa cu no ta tur cos mester of cierto cos a bay for di moda, awel aki nan tur problema ta cuminsa, pasobra cielo y tera lo pasa pero e palabra di Dios lo permanece pa semper.
Especialmente den e area di respet pa Dios y pa nos prohimo, hende a bira tolerante na maldad, apoyador di pica y inmoralidad, sostenedor di abominacion, pero nos tur tin di corda locual tin para scirbi den Galationan 5:19-21 y 1 Corintionan 6:9-10, cu hendenan asina lo no hereda e reino di Dios
y esey lo no cambia pa complace ningun.
Tene bon cuenta cu si un hende ta permiti malcriansa di su yiu den su cas, ora e sali riba caya Polis no ta bay tolera su malcriansa , awel ta mescos cu nos ta tolera maldad, pero Dios den ningun forma lo tolera ningun clase di maldad pasobra nos Dios ta Santo.