Diamars ultimo Parlamento di Aruba a aproba e Presupuesto 2024 cu 12 voto pro y 7 contra. Lamentablemente oposicion, cu excepcion di Parlamentario independiente Santos do Nascimento, no a mira e puntonan positivo di e presupuesto, ni e necesidad pa aporta na pais Aruba. Un presupuesto nacional ta un plan financiero cu ta describi con un gobierno lo inverti su placa durante un aña.
Puntonan positivo di e Presupuesto 2024
- E la keda entrega na tempo, cu ta dia 1 di september 2023, manera nos ley ta perscribi.
- E aña aki ta pa prome biaha cu gobierno di Aruba ta entrega tambe e ‘Nota di Presupuesto 2024’. E ‘Nota di Presupuesto’ ta mustra un resumen cortico di e plannan di maneho di Gabinete Wever-Croes II pa sigui traha riba e futuro di nos pais.
- Nos presupuesto ta demostra di ta balansa y positivo. Segun e ultimo update di 15 di december ta mustra cu tin un entrada di Afl. 1.729 miyon y un gasto di Afl. 1.659 miyon. Esaki ta un surplus di 1.0% di nos GDP cu ta ekivalente na un suma di 70 miyon florin.
- Institutonan manera IMF, CAft, Banco Central di Aruba a duna conseho positivo riba e crecemento financiero-economico di nos isla cu ta incorpora den e presupuesto.
- Gobierno ta cumpli cu e normanan stipula pa CAft y ta mustra cu gobierno tin un ‘Budgetdiscipline’.
- Aruba ta e unico pais den Reino Hulandes cu tin un presupuesto cu un surplus.
- Den e islanan di Caribe Hulandes, e nivel di pobresa ta esun mas abou.
E importancia di e Presupuesto Nacional
E Presupuesto Nacional ta un herment importante pa pais Aruba pasobra e ta ilustra un planificacion y stabilidad economico. E ta duna transparencia y confiansa na e pueblo. Awor cu e presupuesto nacional ta aproba, e ta brinda desaroyo social y oportunidad igual na tur ciudadano. Ademas, e ta fomenta participacion y compromiso publico bou di henter e pueblo.
Speransa y proyectonan pa 2024
Awor cu coalicion den Parlamento y Parlamentario Independiente Santos do Nascimento a aproba e presupuesto, pueblo tin e speransa cu gobierno lo sigui traha den bon direccion pa mantene nos finansas publico riba bon caminda, cual pa hopi tempo no tabata e caso. Adicionalmente gobierno ta haciendo su maximo esfuerso pa traduci e prosperidad macro economico den bienestar pa tur ciudadano. Na comienso di 2024 gobierno lo aumenta e salario minimo y tambe e pensioen di biehes y Gobierno lo bay traha na baha e prima di AZV pa pensionadonan un biaha mas. Por ultimo, mediante un mocion entrega durante di tratamento di Presupuesto 2024, Parlamento di Aruba ta boga na Gobierno di Aruba pa bin cu un miho control di prijs pa asina forsa comerciantenan pa baha nan prijsnan. Pueblo por ta trankil pa loke ta e finansas di nos pais Aruba den 2024 y asina tambe sigui contribui y aporta na e adelanto di nos pais y cada ciudadano.