E konferensia ku a tuma lugá na òktober último, titulá ‘Futuro di Trabou na Kòrsou – Teknologia, AI i Migrashon’, organisá pa Konseho Sosial-Ekonómiko (SER), a kulminá den un manifesto inovativo ku a ser presentá e siman aki. E konferensia ku a tuma lugá den ouditorio di Banko Sentral di Kòrsou i Sint Maarten (CBCS), a ofresé mas ku solamente un plataforma pa diskushon. Presentashonnan profundo a ser hasí tokante tendensianan nobo riba merkado di trabou, ku un enfoke riba e transishon for di un ekonomia basá riba turismo só pa sektornan prometedor manera teknologia di komunikashon i informashon, energia sostenibel i loke ta ser yamá Orange Economy.
E manifesto, kual a sali for di e konferensia aki, ta representá un vishon komun i dedikashon di tur e partisipantenan pa krea un futuro, kaminda trabou no ta solamente un medio pa generá entrada, pero tambe ta un fuente pa duna bida un propósito, oportunidatnan i progreso sosial. E esfuersonan aki ta ser sostené pa metanan spesífiko, datonan i mekanismonan di rindi kuenta. E manifesto ta proponé un Futuro di Trabou enfoká riba e hende, ku ta enkarná ,,nos aspirashonnan komun i ta pone fundeshinan pa un mañan mas hustu i próspero.”
Ku kreashon di un struktura di implementashon den kua diferente aktor envolví lo partisipá, e vishon ta keda konvertí den un plan di akshon konkreto. Esaki ta suprayá e determinashon pa atendé ku e retonan i oportunidatnan di e merkado di trabou moderno i transformá nan den un fuente di orguyo i progreso nashonal.