Ta kico mas mester sosode riba nos isla, laga nos keda cu bista riba nos isla, sin wak ningun isla bisiña of pais bisiña y por fabor no wak riba Hulanda.
Pero laga nos mantene nos bista riba nos isla, pasobra ta aki nan nos ta biba y ta aki nos tin cu preveni pa mas desaster di droga, alcohol y inmoralidad no destrui nos comunidad, especialmente nos hubentud.
Marihuana, cocaina, base, piedra, xtc,lsd, heroina, cerbes, biña,rom, whisky, vodka,liquer y tur e otro bagamunderia cu hende ta usa y bebe cu ta hiba na destruccion.
Cuanto famia no ta kibra?
Cuanto hende no tin cu a muri door di uso di droga y alcohol?
Cuanto hende awor cu nan edad a subi e daño di droga y alcohol den nan nier, pulmon, stoma y curason no ta cuminsa manifesta?
Cuanto accidente di auto ta tuma lugar diariamente pa motibo di alcohol?
Cuanto hende no a keda mancaron despues di un accidente bao di influencia di alcohol?
Cuanto morto no a wordo ocasiona den trafico pa motibo di hende burachi?
Cuanto hende no a perde nan trabao pa motibo di droga y alcohol?
No ta suficiente di mira con nos hubentud enbes di studia pa bira hende serio y integro ta stop di bay scol y cuminsa cana cu un tas chikito riba schouder y bende droga y cana cu arma?
No ta suficiente mira caranan nobo riba caya como adicto?
Scolnan tin problema cu uso di droga, scolnan tin problema cu muchanan cu ta huma marihuana y bini scol, bin busca problema.
Nos no tin nada di sconde pero uso di droga, y alcohol ta contribui nan mal influencia cu hopi biaha a causa violencia y morto.
Ningun gobierno no por a logra pone un control riba uso, benta y traficacion di droga riba e isla aki. Hisando e castigo halto pasobra un hende local cu ta trafica droga den su mes pais ta un hende hopi iresponsabel .
Pasobra e ta na altura e destruccion cu e ta trece y ley mester baha pisa riba dje..
Si bo puntra cuanto hende ta den adiccion tin riba nos isla , ningun hende por duna bo un conteo corecto, pasobra e situacion ta mas grave cu nos ta kere .
E uso di alcohol bao di nos hubentud ta mas alarmante cu hende ta kere , tin mayor cu tin problema cu yiu bao di 15 aña cu ta bebe alcohol.
Bo tabata sa cu tin alumno cu ta wordo gara cu alcohol na scol?
Ten ken por tin e curashi di pensa cu Droga y alcohol ta bon, nos no ta papia di abuso di droga y alcohol, pasobra tur esnan cu kier abusa di droga y alcohol, a resulta cu droga y alcohol ta abusa di nan.
Pasobra asina bo ta un persona cu tur dia bo tin cu usa droga,of tur dia bo tin cu bebe whisky of rom , bo ta bao di nan dominio, no ta importa con chiki, sabi of grandi bo ta, bo tin cu reconoce , arepenti y pidi Dios saca bo for di e situacion ey pasobra e cos ey ta destrui hende.
Lesa Efesionan 5:8 / Proverbionan 20:1 / 1 Corintionan 6:19-20/ 1 Corintionan 10:13/ 1 Pedro 5:8/ 1 Corintionan 6:12 , bo ta hanja informacion kico e Palabra di Dios ta bisa, pa asina hala leu.
Locual inmoralidad ta causando ta un desaster, y no lubida cu inmoralidad ta lanta furia di Dios.
Tur locual ta inmoral ta un abominacion den bista di nos Dios.( Romanonan 1:18-32).
