Un Éksito Rotundo ta Konklushon di e di 8 Simposio riba Kolonialismo Kontemporáneo i Reparashon Den Karibe, organisá pa Bonaire Human Rights Organization (BHRO), ku a tuma lugá na Boneiru, di 29 di novèmber te ku 3 di desèmber 2023
E di 8 Simposio riba Kolonialismo Kontemporáneo i Reparashon den Karibe a kulminá ku un éksito rotundo despues di sinku dia di diskushon interesante, workshop i presentashonnan tremendo selebrá na diferente sitio di Boneiru. E simposio a reuní oradónan, aktivistanan i interesadonan distinguí, promoviendo diálogo krítiko riba temanan ku ta persistí den e region di Caribe.
Na e simposio akí tabatin partisipashon aktivo di delegadonan di diferente pais i teritorio di Karibe, inkluyendo e pueblo di Raizal ku ta apénas konosí, loke ta reflehá un kompromiso kompartí di atendé influensianan kolonial i persekushon di hustisia preparativo.
Agènda marká pa eventonan remarkabel
E agènda di e simposio tabata marká pa eventonan remarkabel, inkluyendo un Debate Polítiko Hubenil vibrante, presentashon skèrpi di Dr. Carlyle Corbin riba Neokolonialismo Kontemporáneo den Karibe i e diskurso profundo di Hefe Dr. Eric Phillips riba Reparashon, lansando lus riba inhustisia históriko i e kaminda pa reparashon. Tambe Miles Henderson, Ko-Presidente di e Komité Di Hubentut di e Grupo Internashonal di Trabou di Sosiedat Sivil pa Desendientenan Afrikano, a lansa suave e Kongreso di Studiante Pan Afrikano.
Visepresidente di CARICOM, Dr. Eric Phillips, pa promé biaha na Boneiru i Antia
E evento aki a marka un momento históriko, ora ku e Organisashon di Derechonan Humano di Boneiru (BHRO), komo Miembro Asosiá di e Komishon di Reparashon di CARICOM, a introdusí ofisialmente pa promé biaha e Visepresidente di CARICOM, Sr. Phillips, kende a duna un presentashon inovativo na Bonaire i e anterior Antia Hulandes tokante Reparashon. E presentashon di Sr. Phillips tabata spesialmente den e konteksto di e Diskulpa resien di parti di gobièrnu Hulandes. E movementu di reparashon liderá pa Hefenan di Estado di CARICOM, ku ta buska hustisia reparatorio pa e krímennan kontra humanidat kometé kontra nos antepasadonan, ta ganando forsa rònt mundu, ya ku resientemente CARICOM i e Union Afrikano a uni den e esfuerso aki pa dilanti.
Apertura ofisial di un ofisina regional di COPPPAL na Boneiru
Otro logro signifikativo tabata e echo ku COPPPAL, pa medio di Sr. Jorge García Córdova, vise sekretario general ehekutivo di COPPPAL, a realisá apertura ofisial di un ofisina regional na Boneiru. Señor Córdova a hasi esaki na nòmber di e Presidente di COPPPAL, Sr. Alejandro Morena Cárdenas, di Méhiko, markando asina nan presensia i representashon na Boneiru, den e ofisina di e Organisashon di Derechonan Humano di Boneiru (BHRO), komo un kompromiso pa reafirmá nan dedikashon na defensa di derechonan humano i promoshon di kolaborashonnan regional.
Lansamentu di e partido polítiko PUEBLO PROGRESIVO UNÍ (PPU)
Ademas, despues di e 536 dianan históriko i inigualabel den 2022 i 2023, durante e hornada i kampanja internashonal, kreando konsiensia i buskando solidaridat na Latino Amérika i Karibe, pa inkluí Boneiru rib’e Lista di Teritorionan-Sin-Propio-Gobernashon di Nashonnan Uní, e simposio a testiguá e siguiente paso di Sr. James Finies: lansamentu di e partido polítiko PUEBLO PROGRESIVO UNÍ. E partido a ser fundá huntu ku Sra. Marjolein Finies. Señor Joe Koolman, di Aruba i Visepresidente di COPPPAL, a papia na nòmber di COPPPAL, ku komo un kaso spesial a aseptá e partido PUEBLO PROGRESIVO UNÍ komo miembro di COPPPAL. Señor Clyde van Putten, e lider polítiko popular di Sint Eustatius, tambe a duna su diskurso i a duna tur sosten na e partido polítiko nobo di James Finies, loke ta nifiká un esfuerso konsentrá pa amplifiká bosnan i logra un kambio positivo den e region.
Lansamentu di un organisashon nobo di sosiedat sivil MOVEMENTU PA KAMBIO (MPK)
Durante e mesun evento di lansamentu, un organisashon nobo di sosiedat sivil, Movementu Pa Kambio (MPK), fundá pa Sr. Sedney Marten i Sra. Kaile Finies, tambe a keda presentá. Meta prinsipal di Movementu Pa Kambio ta pa informá i konsientisá pueblo di Boneiru tokante nan derechonan.
Héroenan di e lucha di Boneiru pa outodeterminashon
E klímaks di e simposio tabata e prestigioso Seremonia i Galardon di Rekonosementu, durante kua a honra e kontribushonnan notabel di Dr. Carlyle G. Corbin pa Teritorionan den Karibe i Pasífiko, huntu ku rekonosimentu di logronan sobresaliente di parti di siudadanonan di Boneiru. Komo héroenan di e lucha di Boneiru pa outodeterminashon, a rekonosé Sr. Elvis Braaf, Sr. Izaak “Uz” Evertsz, Sr. Richard “Rishi” Pietersz i Sra. Sarah Winklaar (kende a haña Rosa Parks komo nòmber di kariño).
E éksito di e di 8 Simposio riba Kolonialismo Kontemporáneo i Reparashon den Karibe ta sirbi komo evidensia di e dedikashon firme di tur partisipante i interesadonan den promové diskurso krítiko, promové unidat i proyektá un rumbo pa un futuro mas hustu i di igualdat pa Karibe.
