Durante e celebracion di Grupo di Betico en conexion cu nan 55 aniversario, Minister Maduro di Cultura compaña pa Minister President den nomber di Gobierno di Aruba a brinda un reconocemento na sr. Marco Leoncito Croes, miho conoci como Papa Maiky. Sr. Croes ta e unico integrante di ‘Betico y su Grupo’ cu awe nos conoce como Grupo di Betico, cu tin 55 aña ta aporta na nos cultura di fin di aña.
Prome cu e grupo a haya un nomber, e grupo tabata toca den seno familiar y despues cu e grupo a dicidi pa sali afo y participa den Festival di Dande, Betico cu tabata lidera e grupo a duna e grupo e nomber di ‘Betico y su Grupo’. Papa Maiky tabata e cantante di Dande di e grupo y unda cu e grupo yega pa presenta Papa Maiky tabata e cantante principal cantando e Dande cu un briyo y smaak masha unico y semper cu su sonrisa y cariño cu ta identifica Papa Maiky. Su forma di canta e Dande, su baile y movecion di mannan tocando su maracanan ta haci Papa Maiky unico den su estilo ora di presenta. Algo peculiar y unico ta cu Papa Maiky nunca a skirbi letra pa Dande, semper ela canta for di cabes, cantando loke ta sali for di su curazon. Papa Maiky a sali Rey di Dande, tanto den ‘Betico y su Grupo’ y despues cu Betico a fayece y mas hobennan a forma parti di e grupo, esaki a haya e nomber di ‘Grupo di Betico’, y aki tambe Papa Maiky a sali Rey di Dande.
Papa Maiky ta yiu Mo Joonchi Croes cu tabata toca y canta Dande cu Mo Tito. Aki por mira un ehempel con tradicion ta wordo traspasa di generacion pa generacion. Di Mo Joonchi pa Papa Maiky y di Papa Maiky pa Maikito, di Maikito pa Michael y di Michael pa Nathan. Aki por mira 4 generacion formando parti di Grupo di Betico y asina traspasa nos tradicion pa e keda biba den nos comunidad.
Papa Maiky ta un ehempel y muestra di amor pa nos cultura y tradicion inculcando loke su grandinan a siñe pasando esaki pa su yiu, nieto y bisanieto. Como tambe e ta un role model, un motivador, un inspirador y un consehero pa cada miembro di Grupo di Betico.
Aruba por ta orguyoso di e aporte di Grupo di Betico y di Papa Maiky cu pa 55 aña caba ta aporta na nos cultura di fin di aña. Pa mustra aprecio na e trayectoria bunita aki, a scohe e momento special durante e celebracion di Grupo di Betico pa reconoce y gradici Papa Maiky pa e 55 aña di dedicacion na nos cultura. Masha danki Papa Maiky.
